Vairengte - Sairang kawng dinhmun sawifiah

Mizoram PWD chuan thuchhuah siamin Vairengte leh Sairang inkar kawngpui NH-54 siamthat hna chu thawh mek a nih thu an sawi.

Thuchhuah an siamah Miizoram PWD chuan January 20, 2025 atang khan Vairengte leh Sairang inkar kawngpui NH-54 chu war-footing in siam that hna kalpui a nih thu leh hei hian WBM material-a pothole repair leh sidedrain repair te pawh a huam thu an tarlang a. He hna thawk tur hian Labour 20 rual chu Mega Food Park-ah riak lutin, Labour Camp dangte pawh Khamrang-Selesih peng bulah siam zawh tawh niin Khamrang thlen hma, Tuitun lei bul leh Rengtekawn area-ah te hna hi thawh tan nghal a ni a, heng hna thawh nan hian JCB, vibratory roller leh tipperte chu a hmunah dah tel a nih thu an tarlang a ni.

PWD chuan Vairengte to Sairang kawng (NH54) hi MoRTH-chuan NHIDCL enkawl turin gazette-ah chhuah tawh mahse PWD-in Ongoing project pahnih Bilkhawthlir to Kolasib leh Kawnpui to Khamrang te la changin, a bak chu NHIDCL kutah a hlan tawh tih pawh an sawi a. Heng kawng pahnih inkar pawh hi nikum lam khan hlan tura a project thawh zawh tawh a ni chungin Khamrang to Kawnpui bik hi Contractor-in maintenance a tih that theih loh avangin Contract tihtawp sak a lo ni tawh a. Helai kawng tha lo thawmthat nan hian MoRTH-lam chuan Mizoram sawrkar kutah Maintenance Fund pe thei tawh lo mah se, Mizoram sawrkar chuan Fur chhunga tha taka lirthei an tlan leh theih nan cheng nuai 75 chu WBM pothole repair nan hian a lo sanction tawh a, thawmthat hna pawh a thawk mek niin an sawi.

He thil hi High Level Meeting-ah pawh sawiho tawhin, NHIDCL chuan heng kawng te hi December thla tawp/ anuary thla tir lama an kuta la fel (takeover) tur angin insawi mahse an remchang leh ta lova. PWD tan enkawl chhunzawmna tur sum sanction MoRTH atanga dil chhuah theih a nih tak loh avang leh NHIDCL chu sanction thar dil theitu zawk an nih tawh avangin NHIDCL kutah hian hlan fel tum a ni a. Maintenance pawh NHIDCL tih chhunzawm tur ni mahse, an remchan leh tak loh avang hian PWD chuan pothole fill-na tur sum sanction chu sawrkarah dil leh mekin, hemi hmachhuan hian hma an la nghal mek niin an sawi bawk.