BBBP kum 10 tlin lawmna leh NGCD khuhhawnna nei

Beti Bachao Beti Padhao (BBBP) kum 10 tlinna leh January 24-a National Girl Child Day lo thleng tur khuh hawnna chu nimin khan Serchhip District Bawrhsap Paul L. Khuma hovin Serchhip DC Pisapui Hall ah neih a ni.

Hemi puala hun hman ah hian Bawrhsap Paul L. Khuma chuan India ram a mipui vantlangte zingah hmeichhe fa aiin mipa fa hlut leh dahsan zawkna thinlung pu an la tam a, hmeichhe fa an pai tih an hriat avanga titla (abort) te an awm thin bakah hriselna, zirna leh ei tur tha pek kawngah pawh mipa naupang aiin hmeichhe naupang ngaihthah an ni fo thin tih sawiin, chutianga inthliarna a reh theihna turin he programme hi buatsaih thin a nih thu a sawi a. India ramah kum 1991-ah chuan mipa 1000 zelah hmeichhia 927 awmin kum 2011 chhiarpui-ah chuan 1000 zelah 940 an awm thu sawiin, Child Sex Ratio (nau piang hlim atanga kum 6) ah erawh chuan chuan kum 1991-ah mipa 1000 zelah hmeichhia 945 an awm laiin kum 2011-ah chuan mipa 1000 zelah hmeichhia 914 an awm thu a sawi a. India ram pumah nau piang sex ratio ah hmeichhia an tlakhniam zel avangin hmeichhe naupangte hlutzia inzirtir thar kan mamawh thu leh sawrkar laipui chuan kum 2015 atang khan chak takin hma a lak thu a sawi a. Hmeichhe naupang te dikna chanvo hum-himna leh mipa leh hmeichhe inthliarna a bo theih nan mi dangte hrilh leh zirtir chhawngtu nih tum turin he huna tel te chu a fuih bawk a ni.

Nimin-a he hun hman hi WCD-a DPO mawhphurhna la mektu James Lalremliana chuan kaihruaiin Gender Specialist V. Lalruatsangi chuan BBBP nihphung leh Serchhip District chhunga hma an lo lak tawh dan te a sawizau a. Beti Bachao Beti Padhao leh National Girl Child Day pual hian kalkhawm ten thutiam an sawi rual bawk a ni.

He hunah hian College Level Public Speaking Competition neih a ni a, he huna titha thlan-chhuahte hnenah a kharna inkhawm, January 24 (Zirtawpni) a neih turah lawmman sem a ni ang.