Serchhip District-ah kum 2024 chhungin nau piang 429 leh mitthi 343 chhinchhiah an ni

Kum kalta 2024 chhung khan Serchhip District-ah nau piang 429 chhinchhiah an nih laiin mitthi 343 chhinchhiah an ni bawk a, mitthi aia naupiang an tamna hi 86 niin nikum chhunga Serchhip District-ah mitthi chhinchhiah zingah hian hmeichhia aiin mipa an tam zawk a ni.

Serchhip-a District Research Officer (DRO) Office in an chhinchhiahna atanga a lan danin kum kalta 2024 chhung khan Serchhip District-ah nau piang 429 chhinchhiah an ni a, heng zinga 215 chu Mipa niin midang 214 chu hmeichhia an ni a, hmeichhe nau piang aiin mipa nau piang hi pakhat in an tam zawk a ni, Nikum chhunga Serchhip District chhunga nau piang zingah hian khawpui (Urban) huamchhunga piang 305 zet an nih laiin thingtlang (Rural) huamchhunga piang chu 124 an ni bawk.

DRO Office atanga LENKAWL in thu a dawn danin nikum chhung vek khan Serchhip District-ah hian mitthi chhinchhiah 343 awmin heng te hi mipa 217 leh hmeichhia 126 an ni a, mitthi zingah hian hmeichhia aiin mipa 91 zetin an tam zawk thung a, mitthi zinga 177 te hi khawpui (Urban) huamchhunga mi niin midang 166 te hi thingtlang (Rural) huamchhunga mi te an ni bawk.

Kum kalta 2024 chhung khan Serchhip District-ah nausen kum khat hnuailam thi pakhat awmin hmeichhia a ni a, hemi hun chhung vek hian kum khat leh kum 5 inkar thi pahnih awm bawkin Mipa ve ve an ni thung a, nausen thi sa a piang pakhat a awm bawk a ni.

Serchhip District-a piang leh thi te hi a tirah Registrar of Births & Death te hnenah a thlawna Registration an tih theih laiin a huna ti lo te tan Delayed Registration tih a ngai thin thung a, kum kalta 2024 chhung khan Delayed Birth Registration ti mi 262 awmin heng zinga mi 5 te chu kum khat chhunga Registration ti an ni a. Delayed Deaths Registration ti mi 23 an awm bawk. Hemi chhung vek hian Births & Deaths Registration ti tawh, engemaw avanga Certificate la thar 946 awmin heng zinga 901 te chu Dirth Certificate lachhuak niin midang 41 chu Death Certificate la an ni.

Comments