Nikum chhungin ASF vangin Vawk sing li dawn chan a ni

Kum kalta 2024 chhung khan Mizoram-ah African Swine Fever (ASF) vanga Vawk thi leh suat sing li dawn awmin kumin ah Vawk thi leh suat chhinchhiah ala awm lo thung.

AH&Vety Department in an chhinchhiahna atanga a lan danin kumhlui February ni 9, 2024-a Champhai District Leithum khuaa ASF Vawk hri vei an finfiah atanga nikum chhung zawnga Mizoram-ah ASF vanga Vawk thi zat chu 14,950 a ni a, ASF darh zel tur venna atan Vawk 24,177 suat a ni bawk a, heti hian nikum chhunga ASF kaihhnawiha Vawk thi leh suat hi 39,127 zet a tling a ni. Mizorama Vawk pulhri leng hian thlasik intan November atang khan ziaawm lam a pan chhova, mimal in Vawk tam tham an vulhna hmun pulhri-in a luhchilh avanga thi leh suat tam ni deuh awm leh zauh thin mah se ASF hri leng hian ziaawm lam pan zelin kum tawp lamah chuan Vawk thi hi a awm belh ta meuh lo a ni.

Mizoram-ah hian March ni 21, 2021 khan Lunglei District a Lungsen khua-ah ASF Vawk pulhri vei finfiah hmasak ber awmin hemi atanga nikum thlenga ASF avanga Vawk thi zat chu 62,167 a tling tawh a. Kum 2021 khan Vawk 33,417 thi in kum 2022 khan 12,761 a thih bakah kum 2023-ah Vawk 1,039 a thi leh bawk a. Heng kum 4 chhung hian Vawk 49,267 suat a ni tawh bawk a. ASF Vawk pulhri avanga Mizoram in Vawk a chan zawng zawng hi 1,11, 434 zet a tling tawh bawk ni.