Nikum-ah Cyber Crime PS-in thubuai 41 ziaklut

Nikum (2024) chhung khan Mizoram-a Cyber Crime Police Station CID (Crime)-ten thubuai 41 an ziaklut a, heng zingah hian pawisa vanga thubuai ziahluh (financial crime) a tam ber.

Cyber Crime hotuten an chhinchhiah danin nikum chhunga thubuai an ziahluh 4` kaihhnawihah hian mi 30 man an ni a, mi panga chu kumtlinglo an ni a. Thubuai siamsak hi mi 18 an ni a, thubuai pahnih thar thawh niin thubuai 15 chu ngaihtuah tura dah rih a ni. State dang nena inkungkaih thubuai pariat chu ngaihtuah tura la dah rih a ni a, State dang nen inzawm la chhuichhuah theih loh pasarih a awm a, thubuai 16 chu ngaihtuah leh tura dah rih a ni bawk a. Heng thubuai avang hian convict erawh an awm lo thung a ni.

Nikum chhunga Cyber Crime Police Station CID (Crime) ten thubuai an ziahluh zingah hian pawisa vanga thubuai ziahluh a tam ber a, National Cybercrime Reporting Portal (NCRP) atangin Financial Crime-ah hian thubuai hrang hranga atangin sum hmuh let hi Rs 89,61,995 a ni a, pawisa la hmuh leh loh cheng nuai 92.61 a ni a, a vaia belhkhawm hi Rs 1,82,22,995 a ni a. Financial crime avang hian mobile phone 106 block a ni bawk.

Kum 2021 atang December 16, 2024 thleng khan Cyber Crime-ah hian thubuai 296 ziahluh a ni tawh a, heng thubuai avang hian mi 106 man an ni a. Mi 38 convict an ni tawh a. Kum 2022 kha Cyber Crime-in case an ziahluh tam ber kum a ni a, case 188 ziahluh a ni a, hemi kum hian convict pawh mi 17 an awm a, convict tam ber kum a ni. Hemi kum vek hi Financial crime ziahluh tam ber tum a ni a, case 107 ziahluh a ni a. Kum 2023 kha hursualna (sexual harassment) avanga thubuai ziahluh tam ber tum a ni a, hemi kum hian case 19 an ziaklut bawk a ni.