LR&S Minister hovin Revenue Department in an hnathawh leh hmalakna te an thlirlet

Land Revenue & Settlement Department changtu Minister B. Lalchhanzova chuan an Department chu dawrtu ngah tak Department a nih angin anmahni dawrtute hmachhawn kawngah hmel hmuh nuam pu turin leh hawihhawmna chhawm nung zel turin a chah.

Land Revenue & Settlement Department hian nimin khan an hnathawh thlirletna hun hmangin he hun hmanpuitu Revenue Minister B. Lalchhanzova chuan Land Revenue & Settlement Department-a thawktu kalkhawmte chu sulhnu felfai leh entawntlak nei tur a inzir peih tur leh intuaihriam reng peih mi ni turin a chah a. Department hnuaia an mawhphurhna zawn theuh ah mi rintlak leh rawntlak ni thei turin kum bul atanga tan la turin a fuih a. Thil dik tawk lo, chinfel ngai nia an hriatte chu midangin an lo en liam thin vang mai a hmu lo dertu nih chu buaina leh harsatna lian zawk thlen thintu a nih fo thu Revenue Minister chuan sawiin, thil tha ti tur chuan buai leh mualpho ngam a hma latu nih tum theuh turin Officer kalkhawmte chu a chah a. Ram teh leh felfai taka chhinchhiah hna kalpui chungchang ah mipuiin Reveneu Department lakah beiseina sang tak an neih thu tarlangin, mipui beiseina tihlawhtling turin mahni mawhphurhna theuh tha taka hlenchhuak turin a chah bawk.

Revenue Minister B. Lalchhanzova chuan Land Revenue & Settlement Department chu dawrtu ngah tak Department a nih angin anmahni dawrtute hmachhawn kawngah hmel hmuh nuam pu turin leh hawihhawmna chhawm nung zel turin a chah a. Hnathawhna hmun chu an rinna fiahna hmun ah hmanga, taimakna, rinawmna leh midang tana malsawnna thlentu an nih theihna hmun a siam thin turin a fuih a. Mipuiin an Office enkawlte tangkai taka an hman theih nan mipui tana hna an thawh sak theih hrang hrangte chu puanzar fo a pawimawh thu a sawi a ni.

Revenue Minister chuan District Collector Office leh Settlement Office-te chu inhne hnai zawk a kalkawp chho zel tur a nih thu tarlangin, mipui tana rawngbawlna an kalpui piah lamah Chhiah lakkhawm hna pawimawh tak an neih chu ngai pawimawh turin a chah a. Department thuam changtlun zel nan Champhai leh Mamit District Pisa sakna tur cheng vbc. 4.68 leh vbc. 4.5 chu SASCI hnuaiah hmuh a nih thu a sawi bawk a ni.

Nimin-a One Day Review Meeting-ah hian LR&S Secretariat, Directorate Officer leh District hrang hranga Settlement Officer-te an tel a, Land Revenue Administration in Mizoram, Revenue Collection-Tax & Non-Tax Revenue leh Stamps & Registration te zirho niin District tina hnathawhna kalpui dan thlirlet a nih bakah LR&S Department hnathawh kaihhnawih a thupui pawimawh hrang hrang te zirho a ni bawk.