Mizoram State Central Library tlawhtu tam

Mizoram State Central Library chuan nikum 2024 chhung khan tlawhtu mi 2700 chuang a nei.

Nikum chhung khan Mizoram State Central Library hi zirlai 2,688 te chuan tlawhin, Research Scholar 47 in an tlawh bawk a, nikum chhunga tlawhtu hi mi 2735 zet an tling a ni. Nikum chhung khan Mizoram State Central Library-ah hian member inziaklut thar puitling 549 awmin naupang 67 an awm bawk a, Lehkhabu hawhtu hi puitling 4,116 leh naupang 549 an awm a ni. Mizoram State Central Library-a State Librarian Zothanglawra Ralte chuan zirlai leh mipuite chu an ta a nih anga State Library chu hmang tangkai zel tura duh thu a sawi a, Mizo mipui a tam thei ang berin State Library chhawr se a duh thu sawiin, Zirlai leh hna zawnglai, Civil Service lam lut duh tan te pawh a hranin nikum atang khan an pual bika siam lehkha dahna hmun ruahman a nih thu a sawi a. Mipui nawlpui leh zirlai te a hmun ngeia kal-a a hlutna hre turin a ngen a. Tunlai thiamna lo sang zelah lehkhabu hlutna a la tlakhniam loh thu a sawi a ni.

Mizoram State Central Library-ah hian tun dinhmunah General Category-ah lehkhabu 49,074 awmin naupang lehkhabu 5,924 leh Hindi lehkhabu 17,427 a awm a. A vaiin lehkhabu 72425 a awm a. Tun dinmunah Mizoram State Central Library-ah hian member puitling 8,088 leh naupang 1,390 awmin, an vaiin Member 9,478 an awm a ni.

Comments