Mizoram Police ten kum 2024 chhungin Kuhvarah kg. 13,01,69 leh Heroin kg. 80.856 an man
Mizoram Police in kum 53 a tlin lawmna chu nimin khan neih a ni a, he hunah hian Mizoram Police te hmalakna hrang hrang tarlan niin kum kalta 2024 chhung khan ramdang atanga dan lova Kuhva tawlh kg. 13,01,693 zet man a nih thu leh Heroin pawh kg. 80.856 zet man a nih thu tarlan a ni.
Mizoram Police dinchampha Raising Day vawi 53-na lawmna hun hi nimin khan Aizawl Khatla-a Mizoram Police Hqrs. G.S. Arya Mess-ah neih niin he hun hi Mizoram DGP Anil Shukla leh Police Officer dang ten an telpui a. He hunah hian Mizoram Police te hmalakn hrang hrang tarlan niin kum kalta 2024 chhung khan Mizoram Police chuan Heroin kg. 80.856 zet manin hei hi Rs. 24,25,68,000 hu nia chhut a ni a, hemi kaihhnawih ah hian thubuai 282 ziahluh niin mi 388 man an nei bawk. Hemi hun chhung vek hian Ganja pawh kg. 305.387 manin cheng nuai 15 chuang hu nia chhut a ni a, thubuai 19 ziaklutin mi 23 an man bawk a. Methamphetamine pawh kg. 627.741 manin Rs. 81,60,63,300/- hu nia chhut a ni a, thubuai 30 ziahluh niin mi 51 zet man an ni a. Crystal Meth pawh kg. 35.155 manin Rs. 1,05,46,50,000 hu nia chhut a ni a, hemi kaihhnawih ah hian mi 3 manin thubuai 4 ziahluh a ni bawk. Heng bakah hian Caffeine kg. 1075 manin Codeine kg. 72 an man bawk a ni.
Mizoram Police te hian nikum chhung vek khan Rakzu litre 9,956.585 manin Sapzu (IMFL) um 4753 an man bawk a, Myanmar zu (BEDC) pawh litre 469 an man a, ramdang siam Zu (IFL) um 1514.5 manin Beer can 19665 leh litre 1,040 an man bawk a, heng Zu kaihhnawih hrang hrangah hian thubuai 187 ziahluh niin mi 226 an man bawk a. Nikum chhung vek khan Mizoram hmun hrang hrangah dan lova ramdang atanga Kuhva tawlh pawh kg. 13,01,693 manin heng hi Rs. 17,54,72,900/- man vel nia chhut a ni bawk a. Heng Kuhva tawlh kaihhnawih ah hian mi 179 man niin thubuai pakhat an ziaklut a, thubuai an ziahluh loh te hi Custom Preventive Force kut-a hlan leh DC te buaipui an ni.
Nikum chhung vek khan Mizoram Police te hian silai 33 leh a mu 58227 an man bakah gelatin tlawn 59827 an man a, detonators 75,627 leh a kaihhnawih thahnem tak an man bawk a, heng ralthuam leh a kaihhnawih hrang hrangah hian thubuai 47 ziahluh niin mi 56 zet man an awm a, an mi man zingah hian ramdang mi 10 an tel bawk. Sum leh pai-a inbumna thil avangin mi hrang leh thubuai hrang hrangah belhkhawmin cheng nuai 92.61 khawih chet theih lohva hren a ni a, internet kaltlanga inbumna (cyber crime) thilah Cyber Crime Police Station chuan Rs. 89,61,995/ - a man/hmuhlet sak bawk a ni. Heng bakah hian sum leh paia inbumna avangin mobile phone 106 chu khawih theih lohva block a ni.
January 21, 1972-a Assam State hnuaia District Council atanga Mizoram chu Union Territory-a hlankai a nih ni vek khan IJ. Verma IPS chuan Mizoram Police IGP hmasa ber ni turin mawhphurhna a la a, hemi ni hi Mizoram Police din champha atan a pawm a lo ni ta a. He ni hi kawng hrang hrangin lawm a ni thin a, midangte tana thil tha tihna leh thil pawimawh inzirtirna atan te hman thin a ni.