Mizoram-a khualzin rawn lut nuai 2 chuang awm

Kum 2023-2024 chhung khan Mizoram-ah khualzin 2,19,114 awmin ramdang atanga rawn zin chu mi 3884 an ni.

Tourism Department chhinchhiahna atanga a lan danin kum 2023-2024 inkarah Mizoram-ah khualzin 2,19,114 awmin heng zinga 3884 chu ramdang mi niin a bak 2,15,230 chu ramchhung khualzin an ni a. Kum 2022-2023 khan khualzin 2,22,008 awmin heng zinga 3551 chu rampawn khualzin niin 21,8457 chu ramchhung atanga rawn kal an ni thung a. Kum 2024-25 chhung hian Rs. 238,70,246/- an hmu tawh a ni.

Tourism Department Joint Director Lalthakimi Pachuau chuan Tourism Department chu Mizoram sawrkar sum intodelh nana Department pawimawh tak a ni tih sawiin, Tourism ti hmasawn turin Mizoram mipuite chu an pawimawh vek thu leh mikhual chunga that chhuah inzirtir a ngai tih a sawi a, nikum lamah Tourism Awareness Campaign chu an kalpui thu a sawi bawk. Tun dinhmunah Tourism Department hnuaiah hian post 112 awmin post 95 chu hnawhkhah a ni a, post ruak 17 awmin a nghet lo a thawk mi 126 an awm bawk a ni.