Mizoram-ah Jail tang 1591 an awm mek

Nikum 2024 chhung khan Mizoram Police-te chuan cheng vbc.211.64 chuang hu ruihhlo an man.

Police hotute sawi danin nikum chhung khan Heroin kg. 80 leh gram 856 an man a, an Heroin man hi cheng vbc. 24.25 chuang hu a chhut a ni a. Heroin tawlhruk, kawl leh hralh chungchangah hian Narcotic Drugs & Psychotropic Substances Act, 1985 hnuaiah thubuai 282 ziaklutin a inhnamhnawih a puh mi 388 an man a ni. Nikum chhung vek hian Police-te’n Crystal Meth kg. 35 leh gram 155 manin cheng vbc. 105.46 chuang hu a ni a, hemi kaihhnawihah hian ND&PS Act hnuaiah thubuai 4 ziaklutin mi 3 an man a, Methamphetamine pawh kg. 627 leh gram 741 manin cheng vbc. 81.61 chuang hu a ni a. Methamphetamine kaihhnawihah mi 51 manin ND&PS Act hmangin thubuai 30 ziahluh a ni a. Nikum chhunga ruihhlo kaihhnawiha ND&PS Act hmanga thubuai ziahluh hi 339 niin mi 468 man an ni. 

Heng bakah hian Caffeine kg. 1,075 manin cheng nuai 15.6 hu a ni a, Ganja kg. 305 leh gram 387 manin cheng nuai 15 chuang hret hu niin damdawi pangngai, ruih nana hmansual Codeine telna, khuh damdawi leh alprazolam cheng nuai khat chuang hu an man bawk.

Excise & Narcotics Department pawhin nikum chhung khan Heroin kg. 46 leh gram 566 leh Methamphetamine kg. 138 leh gram 817 an man a. Mizoram-a ruihhlo dona dan kengkawhtu Department 2-te’n nikum a an man belhkhawm hi Heroin kg. 127 leh gram 455 leh Methamphetamine kg. 766 leh gram 558 a tling a ni. Hetihlai hian nikum chhung khan ruihhlo hmansual vangin Mizoram-ah mi 71 an thi a, heng te hi mipa 60 leh hmeichhia 11 an ni.