Mizo naupang 5 ten huaisen lawmman dawng dawn

Mizo naupang panga (5) te chuan tun thla ni 26-a India Republic Day-ah India President hnen atangin huaisen lawmman an dawng dawn.

Mizo naupang huaisen lawmman dawng turte hi F.Ramropuia (14) s/o Lianzami, Thenzawl Venghlun; Zosangpuii (15) d/o Zodingliana, Ruantlang Mual Veng; Lalhmingsanga (19) s/o Zaithangpuii, Kanghmun South; Lalrinmawia (16) s/o Lalrotlianga, Sialsuk Babu Veng leh Lalhriatzuali (18) d/o R.Vanlalsawma, Thenzawl Bazar Veng te an ni a. An zinga mi, F.Ramropuia, Zosangpuii leh Lalhmingsanga te hi nikum lama dawng tura tih an ni a; amaherawh chu engemaw rokhawlhna avangin an dawng ta lo a, kumin hian huaisen lawmman dawng tura thlan thar mi pahnihte nen naupang panga in huaisen lawmman hi an dawng dawn ta a ni.

Thudawn danin F.Ramropuia hian tui tla a chhanchhuah vangin huaisen lawmman hi a dawng dawn a, Zosangpuii hi a pa electric-in a man a chhanchhuah vanga dawng tur a ni a, Lalhmingsanga hi car-in naupang a tipalh tur a chhanna lama dawng tur a ni. Kumina huaisen lawmman dawng tura thlan thar, Lalrinmawia hian nikum August 7 khan Sialsuk YMA Tuikhuah-ah a thianpa tui tla a chhanchhuah vangin lawmman hi a dawng dawn a, Lalhriatzuali hian nikum May 31-a a laizawn (cousin) chu electric laka a chhanchhuah vangin a dawng dawn a ni.

Naupang huaisen lawmman dawng turte hian January 24, 2025 hian New Delhi an pan ang a, February 1-ah Aizawl lo letin ruahman dan chuan February 3, 2024-ah Social Welfare Minister-in thingpui a inpui ang. Thudawn danin Mizoram-ah naupang huaisen lawmman dawng hi kumin a dawng thar tur chhiar tel lohin mi 40 an awm tawh a, an zinga mi 13 hi thih hnua dawng an ni.