Chhingchhip-a MIFCO hmun ah Serthlum sawr hna kalpui tan a ni ve leh ta

Serchhip District chhung Chhingchhip-a Mizoram Food & Allied Industries Corporation (MIFCO) hmunah Serthlum (Orange) sawr tan a ni leh ta a, helai hmunah hian Lakhuihthei sawr hna pawh kalpui mek a ni bawk.

Chhingchhip MIFCO hmun-a Serthlum sawr hna hi December 27, 2024 khan kalpui tan niin he hun hi MIFCO Chairman Lalthazuala Rawite chuan a telpui a, Kristian te hunpui hman lai ni mah se Serthlum neitute leh a leitu turte remchan lai anih avangin MIFCO a thawktute nen ruahmanna siama Serthlum chu sawr a nih thu sawiin, hun rei tak Serthlum sawrna khawl hman loh a awm tawh hman leh theih tura an ruahmanna ah thawktute fakin, hmun hrang hrang a khawl leh hmanrua hman tangkai loh a awm tawh chu ZPM sawrkar chuan Kut hnathawktute tan tangkai taka a hman chhoh dawn thu te, khawl siamthat (Repair) ngai leh Upgrade ngaite pawh eirukna tel lova thuamthat chhoh tum anih thu te a sawi a,C hhingchhip=a MIFCO hmalakna bakah hian Bung Bangla Zemabawk-a ‘Ran talhna’ leh ‘Meat Processing Plant’ chu kumthar 2025 atanga a taka hman theih tawh turin a hmangtu turte nen Memorundum of Understanding (MoU) an sign dawn a sawi a. Sairang-a ‘Water Treatment Plant ‘ pawh kumthar atanga hman theih tura buatsaih mek anih thu te pawh a sawi bawk.

Tun tuma MIFCO ten Chhingchhip-a Serthlum an sawr hi Serchhip District-a Hualtu khua te tharchhuah niin ‘Tui Bon Natural Pvt. Ltd.’Chaltlang Aizawl te ta a ni a, anni hian Hualtu khuaa Farmers te atanga Serthlum hi leiin Chhingchhip-a MIFCO hian lo sawr sak bakah phai lamah man man zawkin an pe chhawng leh dawn a ni.

Chhingchhip-a MIFCO hian nikum June thla atang khan Sapthei sawr hna hi bul an lo tan tawh bakah Lakhuihthei sawr hna pawh an lo kalpui tawh bawk a, tunah hian Serthlum an sawr leh bakah hian Baibing leh Rawtuai Tin te pawh siam theih a nih thu thawktute chuan an sawi a, tun dinhmunah thawktu mi 6 an awm mek a ni.

MIFCO Chairman Lalthazuala Rawite hian Inrinni khan Bung Bangla, Zemabawk a Pork & Poultry Processing Plant chu tlawhin “Tun atanga hun reilote ah Ar leh Vawk sawngbawlna hmun hi hman theihin peih a ni dawn a, mipuiten sa thianghlim ei tur kan nei thuai dawn a ni,” a ti bawk a. “Kum 2008 khan he hmun hi hman theih turin hawn a lo ni tawh a, mahse sawrkar hmasate khan eng harsatna nge an neih ka hre lova, Vawiin thlengin an la hmang lo,” tiin tunah rih chuan Vawksa sawngbawl phawt a nih dawn thu a sawi bawk.