8th Schedule-a Mizo tawng chuan ve a pawwimawh ti

Mizoram Assembly Speaker Lalbiakzama chuan India Danpui 8th Schedule-a Mizo tawng a chuan ve pawimawhna sawiin, a tel ve theihna tura thawhpui theuh turin Speaker leh ram hruaitu rual te chu a ngen.

All India Presiding Officers' Conference 85-na, Patna, Bihar a neih chu nimin khan chhunzawm leh niin Lok Sabha Speaker Om Birla, Rajya Sabha Deputy Chairman Harivansh Narayan Singh leh ramchhunga Speaker leh Deputy Speaker kalkhawmte hmaah Mizoram Legislative Assembly Speaker Lalbiakzama chuan India Danpui 8th Schedule-a Mizo tawng a chuan ve pawimawhna sawifiahin, a tel ve theihna tura thawhpui theuh turin Speaker leh ram hruaitu rual kalkhawmte chu a ngen a. India ram chu 'Mother of Democracy' ti a sawi hlawh hial, hnam leh tawng chi hrang hrang infinkhawm 'Unity in the midst of diversity' lo tih theih phahna khawpa ram Danpui Constitution duangchhuaktute fakawmzia sawiin, he Constitution tha leh hlu tak hi vawnhim zel a pawimawh thu a sawi a. Sakhaw zalenna chungchangah pawh Constitution in a tarlan ang ngei a khua leh tui zawng zawng ten an duh zawng Sakhua an zui zel theihna tura Constitution vawnhim kawngah tan la zel turin kalkhawmte chu a ngen a ni.

Hetihrual hian sakhaw zalenna ram ropui ti a sawi thin ramchhung ngeia inrahbehna awm thin chu pawi a tih thu pawh sawiin, December ni 29, 2024-a Howrah, Kolkata, West Bengal-a Christian minority-te chunga thil thleng chungchang a sawilang a. Khami tuma West Bengal Speaker Biman Banerjee hnena a lehkha ziak bawhzuia rang taka ani in hma a lo lak avangin lawmthu a sawi a. Inlungrual tak a awm tlang dial dial tur in kalkhawm zawng zawng te a sawm a ni.