Synod Rorel neih tan a ni

Mizoram Presbyterian Kohhran Inkhawmpui rorelna sang ber, Synod Inkhawmpui vawi 101-na Rorel ni khatna chu nimin khan Aizawl-a Mission Vengthlang Biak In-ah neih tan a ni.
Nimin a Rorel Inkhawm ah hian Palai inchhiarnate neih a nih hnuah Synod Moderator kalchhuak Rev. R. Vanlalnghaka chuan Moderator thar Rev. RC. Lalnghakliana hnenah mawhphurhna a hlan a, Rev. RC. Lalnghakliana hian Rorel bakah Synod Inkhawmpui Vantlang Pathian Biak Inkhawm zawng zawng a kaihruai nghal ang. Tun tumah hian General Agenda 35 awmin SEC leh Board atanga thu lut engemaw zat a awm bawk a. Synod Rorel hian December 7, 2024 thleng a awh dawn a ni.

Nimin-a Synod Rorel-ah hian Pastor te awmna hmun siam danglam a ni a, Serchhip Bial enkawltu Pastor, Rev. ZD. Lalhmachhuana chu Lungdai Bialtu Pastor K. Ramdinthara chuan a rawn thlak anga, Serchhip-a FG&CC Counsellor atan Rev. Jonathan Pachuau chu Biate Bial atanga rawn awmin Rev. Rolungmuana Zadeng chu Arunachal North-ah Field Secretary in a awm anga, Chhiahtlang Kawn Veng Bialtu atan Rev. R. Lalrem-siama dah a ni bawk. Kumin-a Synod Inkhawmpui-ah hian Thlarau lam thupui atan 'Lalpa kawng buatsaih' (Isaia 40:3-5) tih hman a ni.