South Zone Middle School Sports neih tan a ni
Middle School 7 te telna Serchhip South Zone Middle School Sports hi Serchhip SDEO Melody L. Betlu chuan khuallian nia hawngin zirna ah infiamna chu a pawimawh thu sawiin, NEP 2020-ah pawh Sports leh Physical Education chu dah pawimawh a nih thu leh Academic Learning ang maia ngaih pawimawh chhoh a nih dawn thu a sawi a, zirna kalpui mekah pawh CCA kan uar zel thu sawiin, hei hian naupangte chu eng kawngah emaw tal thiamthil an neih nan leh anmahni tuina kawngah eizawnna tlak an neih theih nana chher hriam tura tanlak a ngaih thu te a sawi a. Zirlaite pawh thiamthil pakhat tal neih tum tura chahin, tuina zawng an nei loh a nih pawhin tui chawp tura inzir turin a chah bawk a ni.
Nimin-a Serchhip South Zone Middle School Sports hawnna hun hi F. Ramdinpuia chuan kaihruaiin Serchhip-a Middle School 6- Govt. M/S Serchhip, Model M/S, LM M/S, Govt. Chanmari M/S, Chawngbuangi Memorial School leh Goodwill English Academy bakah Govt. Hriangtlang M/S te an tel a. Zirna In hrang hrang aiawhte chuan thianghlim taka infiamna kalpui tura thutiam lain hemi hnu hian intihsiakna neih chhunzawm nghal a ni. Tun tumah hian infiamna Items hrang hrang- Athletic, Volleyball, Football, Tug of War, Poison Ball leh Penalty Shoot hmanga intihsiakna neiin Ningani ah zofel hman tura ruahman a ni.