Mizoram Science Mela 2024 khuhhawnna neih a ni

Sports & Youth Services Department leh Mizoram Science, Technology & Innovation Council (MISTIC) buatsaihin ‘Mizoram Science Mela 2024’ khuhhawnna chu nimin khan neih a ni a, Sports Minister Lalnghinglova Hmar chuan khuallian niin a hmanpui a ni.

Science Mela hi 28th National Youth Festival puala programme ruahman niin Ministry of Youth Affairs & Sports leh Ministry of Science & Technology-te tangkawpin he hun hi India State tinah a buatsaih a. Thupui atan ‘Innovation in Science & Technology’ tih hmangin he hunah hian kum 15-29 inkar ten Science lam kaihhawiha an thil siamchhuah te an phochhuak a, inelna neih nghal a ni.

Innovation Facility Centre, MINECO-a ‘Mizoram Science Mela 2024’ khuhhawnna hunah hian Sports Minister chuan Mizo tena Science kan ngaih pawimawh thar a tul thu sawiin, Science chu subject harsa leh danglam bik ni lovin, taima tak leh thahnemngai taka zir chi a nih thu a sawi a. Zirlai leh thalai kalkhawmte chu thil siamchhuah hmangtu ringawt ni lova a siamchhuaktu zinga tel ve tura hma la turin a chah bawk a. Tunlai thiamna chi hrang hrangte chu internet kaltlanga kan banphak maia a awm thu sawiin, tangkai taka hman tum turin a chah a. Mizoram Science Mela atang hian rilru thar pu a, Science thlir dan thar neia zir turin zirlaite a fuih bawk.

Mizoram Science Mela-ah hian District hrang hrang atangin mi 25 ten inelna an nei a, he Science Mela hi ni hnih (2) awh tur niin a titha zual te hian Mizoram aiawhin 28th National Youth Festival-ah an thil siamchhuahte an phochhuak dawn a ni.