Hmunphiah leitu turte nen inremna ziah dan tur duang

Mizoram Agricultural Marketing Board (MAMB) chu nimin khan Chief Minister Lalduhoma hova thukhawmin Hmuhphiah leitu turte nena inremna ziah dan tur an duang.

CM Conference Hall-a thutkhawm neih ah hian Hmunphiah lei thei turte zawnna (expression of interest) neih tawhna atanga sawrkar rate bituk zata lei thei tur firm te nen season khat chhung inremna siam an remti a. Buyers ten an lei theih bak zawng chu sawrkarin lei mai se tiin thutlukna an siam a. Buyers ten sawrkar warehouse an hman theih dan tur ruahmanna pawh duan a ni a, warehouse hman theih te hi a tul zual chei mek a ni. A hmang duh Empanelled buyers ten a hming chauha luahman pein an hmang thei anga. District Level (DAMC) atanga Secondary Collection Centre atana hman theih list an thehluh pawh an pawm bawk a ni.

Tarlan tawh thin angin sawrkarin thlai thar a lei tur te hi Support Price pek ngai lova kalpui theih (Support price aia sanga hralh theihna) ah chuan zalen taka lei leh hralh theih (open market) reng a ni a. Support price hnuaia luhpui a tul hunah sawrkar ruahmanna anga kalpui tur a ni thung. Hmunphiah hi a hring chu Support Price pek a ni dawn lova, a ro chauh Support Price siam a ni. Sawhthing leh Aieng chu sawrkarin Support Price a pek theih hun chhung chu January - May inkar a ni a, Hmarcha leh Hmunphiah-ah January - March a ni. Support Price pek ngai lo chu zalen taka lei leh hralh kalpui theih reng niin Support Price pek ngai te rawh chu Secondary Collection Centre-ah zel pek tur a ni. Tunah hian District tinah District Agricultural Marketing Committee (DAMC) hmalakna in heng Secondary Collection Centre/Auction Sentre hi siam fel mek a ni.

Sawrkar in Support Price a pekna tur chu heng Secondary Collection Centre-ah zel hian a ni anga, khaw hrang hrang ten sawrkar rate siam aia tlawm a an khua-a an hralh duh pawhin phal vek a ni a, mahse Support Price chu heng Sawrkar in a ruat Collection Centre-ah zel tur a ni a, a phurh thlenna, Transport Cost chu Society ten a tul angin an lo buaipui ang. December ni 6 khian Baptist Centre, Falkland-ah MAMB leh Agricultural and Processed Food Products Export Development Authority (APEDA) tangkawp chuan Buyers-Sellers Meet an buatsaih dawn a. Foreign atangin Company 13 leh India ramchhung atangin Company 22 ten an rawn tel tur thu an tichiang tawh a ni.

Nimin-a thutkhawm ah hian Agriculture Minister PC. Vanlalruata, Supply Minister B. Lalchhanzova, Industry Minister F. Rodingliana, Adviser to CM Dr. KC Lalmalsawmzauva leh MAMB Members te an tel a ni.