Department hrang hrangte thawhho thiam tul ti

Information & Public Relations Minister Dr. Vanlalthlana chuan, sawrkar Department hrang hrang te tun aia an thawhho thiam chuan thil tha leh liantham zawkin hna a thawh theih dawn tih a sawi.

Sikkim-a zin Mizoram Journalist Association Member te puala an zin report ngaihthlakna hun nimin-a Information & Public Relations Minister Pisa-a neih ah I&PR Minister chuan Mizo-ram in hmuhma a neih that te phochhuah kawngah Mizoram chu a thiam tawk lo deuh nia a hriat thu a sawi a, Khualzin hip lama hmalakna kawngah pawh Information Department ten an pholan sak loh chuan awmzia a nei tlem nia a hriat thu a sawi a, hei vang hian Department hrang hrang te thawhho thiamna atangin thil lian tham zawk a tih theih a beisei thu a sawi a ni. 

Sikkim tlawha kal MJA member te hi mi 10 niin November ni 26, 2024 khan Aizawl chhuahsanin November ni 30 (Inrinni) khan an rawn let leh a. Nimin-a Minister hova inkawm khawmna ah hian hun danga Press tour neih leh a nih chuan tangkai zawk leh awmze nei zawka kalpui zel dan turte an sawiho bawk a ni.