Vawiin ah SHC Inthlanpui vawi 2-na neih a ni dawn

Sinlung Hills Council (SHC) Inthlanpui vawi 2-na chu Vawiin hian Bial 12-ah neih a ni dawn a, Candidate mi 49 an awm a ni.

Sinlung Hills Council Inthlanpui neih tur atan hian inbuatsaihna engkim peihfel a ni tawh a, nimin khan Inthlanna a Duty turte pawhin an Duty-na tur hmun hi an pan tawh a, tukin dar 7:00 atang hian mipui ten Vote thlakin tlai dar 4:00 thlengin Vote thlak hun hi hawn a ni dawn a, ruahman lawk angin Ballot Box zawng zawngte hi Voet thlak zawh veleh Constituency Headquarters panpui nghal tur a ni a, Constituency Headquarters-ah Vote tla te hi chhiar nghal tur a ni ang.

Bial 12 awmna Sinlung Hills Council-ah hian Bial 6 chu Aizawl District a awm a ni a, Saitual District-ah Bial 4 leh Kolasib District-ah Bial 2 a awm bawk a, Kolasib District-a Polling Station 7 bakah Aizawl District-a Polling Station 6 leh Saitual District-a Polling Station 3 te chu ven uluk ngai zual a ni a, Sinlung Hills Council-ah hian voter 23,794 awmin Mipa 11,875 leh Hmeichhia 11,914 an ni.

Sinlung Hills Council inthlan turah hian Candidate 49 awmin Hmeichhe Candidate pakhat chiah a awm a, Congress chuan bial zawng zawngah Candidate an nei a, MNF in Bial 10-ah Candidate an nei bawk a, ZPM chuan Bial 8-ah Candidate an neih bakah Bial 4-ah HPC nen tangdunin Candidate an nei bawk a, BJP in Candidate pakhat neiin, Independent Candidate 14 an awm bawk a, Independent Candidate zinga pahnih chu MNF in an thlawp a ni.