HPC Vice Chairman in Lunglei-a DCU Office a tlawh

Lunglei High Powered Committee (HPC) Vice Chairman V. Malsawmtluanga MLA chuan nimin khan Lunglei-a District Cooperative Union Limited (LDCU) Office tlawhin thawktute nen an inkawm.

He an inkawmna ah hian HPC Vice Chairman chuan hna thawktu intelkhawma hmalakna (cooperative society) chu ramchhung ei leh bar hmasawnna atan leh mipuite dinchhuahna atana pawimawh tak a nih thu sawiin, ram changkang apiangah Cooperative Society kaltlanga hmalakna a lianin, sum leh pai thawhchhuahna kawngah leh sawrkar tha tihchakna kawngah pawh an thawhhlawk tih a sawi a. Mizoram-ah Kohhran leh tlawmngai pawl ah thawhhona tha tak kan neih laiin, sumdawnna leh eizawnna atana thawhho dan kan thiam tawk lo niin a sawi a. Mizoram-ah a din chhan anga kal lo leh sawrkar ruahmanna kaltlanga sum hmuh nan chauh din nia ngaih theih Society a tam nia a lan thu a sawi bawk.

Lunglei District Cooperative Union Ltd hi Mizoram sawrkar hnuaia Grant-in-Aid Centre for Cooperative Education niin, Mizoram Cooperative Societies Act hnuaiah May 31, 1993 khan din a ni.