Tour Itinerary Creation Competition-ah Serchhip DC Office in lawmman pakhatna dawng

Mizoram-a a vawi khatna atan nizan hmasa khan District-Wise Tour Itinerary Creation Competition chu neih niin he intihsiakna ah hian Serchhip DC Office chuan lawmman pakhatna a dawng a ni.
Mizoram sawrkar-a Tourism Department chuan Tourism lama hma kan sawn theihna turin Mizoram chhunga District tin Deputy Commissioner ten nena tangkawpin District-Wise Tour Itinerary Creation Competition hi nizan hmasa khan Aizawl Khatla-a Ignite Studio-ah an buatsaih a, he hunah hian Mizoram-a District tin aiawh mi 11 ten Itinerary an siam te chu powerpoint presentation hmangin an phochhuak a, endiktu tura ruat ten lo enfiahin zawhna an neih hrang hrangte chu District aiawha tel te hian an chhang zel a. Deputy Commissioner, Serchhip District chuan lawmman pakhatna la in pawisafai Rs.30,000/- an dawng a, pahnihna chu Deputy Commissioner, Saitual District niin Rs. 20,000/- an dawng a, lawmman pathumna chu Deputy Commissioner, Lunglei District niin Rs.10,000/- an dawng bawk a. District zawng zawngte hi Certificate pek vek an ni.

He intihsiakna ah hian Serchhip DC Office aiawhin SDC Dr. C. Vanlalchhanhimi chuan Serchhip District chhung tlawha ni 5 chhunga khualzin ten an tlawh theih tur hmun pawimawh hrang hrangte bakah khualzin te tana tlawh chakawm tur thil pawimawh hrang hrangte a tarlang a, khualzin te tana remchanna awm hrang hrangte a tarlang bawk a. He hunah hian Serchhip Addl. DC Lalrinzuala pawh a tel bawk a ni.

Nizan hmasa a District-Wise Tour Itinerary Creation Competition hi Rural Development Minister Prof. Lalnilawma chuan hmanpuiin District-Wise Tour Itinerary Creation Competition buatsaih a ni chu lawmawm a tih thu leh Deputy Commissioner ten phur taka Tourism hmasawnna atana an District theuh a Tourist destination an rawn phochhuak chu hmasawnna pawimawh tak a ni tih a sawi a. Tourism Minister Lalrinpuii hmathlirna fing tak leh ruahmanna avanga hetiang intihsiakna hlawhthlak tak buatsaih a ni chu lawmawm a tih thu sawiin, Mizoramin khualzinmite hip theihna kan nei tha a, kan la haichhuah tur pawh tam tak a la awm ngei ang tih a sawi a. DC tin ten an District theuha Tourist footfall a tam zawkna tura destination tha tur an rawn phochhuah te chuan beng a tivarin mit a tihtlai bakah Khualzinmite hipna kawngah hmasawnna a thlen belh ngei dawn niin a sawi a. Mikhualte chunga that chhuah thin Mizote tluka Khualzinmite lo dawl thei tur an awm bik lo tih sawiin, “Kan tangrual anga, Mimal tin te hi Mizoram Tourism Promotion atan Brand Ambassador nih kan tum phawt chuan nasa takin hma kan sawn ang,” a ti bawk.