State Human Rights Commission din turin hma la

Mizoram sawrkar chuan State Human Rights Commission din turin chak takin hma a la mek.

Home Department hotute hnen atanga thudawn danin October thla khan State Human Rights Commission dinna tur hriattirna hi Mizoram sawrkar chuan a chhuah tawh a. Hemi atan hian hnathawk 16 lakna tur pawh sawrkarin a pawmpui tawh bakah Commission dinna tur atana thil tul dang bawk chak taka bawhzui mek a ni. Gauhati High Court chuan State Human Rights Commission din tur hian Mizoram sawrkar chu na taka nawrin September ni 6, 2024 khan thla hnih (2) chhunga Commission hi din ngei turin thu a pe a. A din lo a nih chuan na taka hrem a nih tur thu in a vaukhan tawh a. Hei hi a chhan chu Commission dinna tur hi kum tam tak Mizoram sawrkarin a tihkhawtlai tawh vang a ni a. Chief Justice Vijay Bishnoi leh Justice Michael Zothankhuma te thutna Division Bench chuan sawrkarin Human Rights Commission din an tikhawtlai chu a lungawithlak loh thu na takin an sawichhuak a. Hnathawk tur lak chungchang sawrkarin a sawi pawh chu thu mai, a taka chantir la ni lo niin High Court chuan a ngaih tur a tarlang a ni. 

Mizoram State Human Rights Commission din chungchang hi kum 2021 khan Public Interest Litigation (PIL) hmangin Zofa Welfare Organization (ZWO) President Rev. Robawia chuan a lo thehlut tawh a. PIL-ah hian Protection of Human Rights Act, 1993 tlawhchhana Mizoram a State Human Rights Commission din ngei a nih theih nan ngenna an siam a ni. High Court chuan Supreme Court-in kum 2015 a Dilip Kumar thubuai thehluh behchhana tihtura thupek dinglai awm chu Mizoram sawrkar hian a la tipuitling lo a ni, a ti.

Hemi hmalam hian Mizoram sawrkar chuan State Human Rights Commission dinna atan hian hna 29 siam tura sawrkara dil chu kumin August ni 8 khan 16 siam phalsak a nih thu a sawi a.  High Court chuan hei hi a tawk lo ni a sawiin, Protection of Human Rights Act, 1993 tlawhchhan a thla 2 chhunga din a nih loh chuan Court zah lohna thubuai chu Mizoram sawrkar lakah ziaklutin hremna na tak pek a nih tur thu a hriattir a ni.