MPL 11-a Match Fixing-a tel te MFA in hremna a puangchhuak

Mizoram Football Association (MFA) chuan Mizoram Premier League Season 11-a Match Fixing kaihhnawih ah Club pathum leh player 24 bakah Coaching Staff mi pathum te chu a hrem ta.

Tunhnaiah MPL 11-a Match Fixing a awm ngei nia sawi awm chungchang ah MFA chuan hemi chungchang hi uluk taka chhuiin CID te nen hemi chungchang hi an chhui a, nimin khan hemi chungchang ah hian thuchhuah siamin hemi kaihhnawih ah hian player 25, Coaching Staff mi 3 leh Club pathum te chu an hrem ta a ni.

Thudawnna in a tarlan danin Betting thil ah Club, Coaching Staff leh Player te hian sum an dawng a, pawisa thaptute thu thuin MPL-ah result an siam a, hei hi MFA chuan ringhlelin ngawrh taka an chhui hnuah MPL Club pathum, Sihphir Venghlun FC, FC Bethlehem leh Ramhlun Athletic FC te chu kum 3 chhung Football thila inhnamhnawih thei lo tura hrem an ni a. Heng bakah hian Coaching Staff zingah Robert Laldinthara (Sihphir Vengthlun FC) chu kum 5 chhung Football kaihhnawih a inhnamhnawih thei lo tura hrem an ni a, Danny Lalduhawma (Ramhlun Athletic FC) chu kum 3 chhung atan leh Johny Ramthan-sanga (FC Bethlehem) chu kum 3 chhung atan hetiang bawk hian hrem an ni bawk.

Heng bakah hian Chanmari FC player Lalnunzama leh FC Bethlehem player L. Lotha te chu hremna tuar nasa ber niin damchhunga Football kaihhnawiha inhnamhnawih thei lo tawh tura hrem an ni a, Player dang 23 te pawh an tihsual ang zela hremna pek niin Sihphir Venghlun FC atangin player 14 lai  hremna pek an ni a, Ramhlun Athletic FC player 4, Chawnpui FC player 3 leh FC Bethlehem player 2 te chu hremna pek an ni bawk a, heng mi te hi a tlangpuiin kum 1 te, kum 3 leh kum 5 chhung te Football leh a kaihhnawiha inhnamhnawih thei lo tura hrem an ni.