Larsap in NE Trade and Investment Roadshow telpui

Ministry of Development of North Eastern Region (DONER) leh Federation of Indian Chambers of Commerce & Industry (FICCI) te tangkawp buatsaih Northeast Trade and Investment Roadshow chu nimin khan Hyderabad-a Park Hyatt-ah neih niin he hun hi Governor Dr. Hari Babu Kambhampati chuan a hmanpui a ni.

Northeast Trade and Investment Roadshow-ah hian Governor chuan Investor kalkhawm zinga Drone Pilot Training leh Service provider-te chu Mizoram Sawrkar nena thawkduna Agriculture leh pawimawh danga Drone hman dan inzirtirna buatsaih tura a sawm bakah, Technology lama theihna sang tak nei Mizo thalaite chhawr tangkai an nih theih nan IT Company leh Skill Development provider-te chu hun remchang siam sak turin a sawm bawk a. North East India chu ram leilung hausa leh theihna sang tak nei a nih thu sawiin, Industrialist-te chu hei hi remchanga hmanga technology nena tangkawpa tan la turin a sawm a. Mau tamna North East State-ah Ethanol siam chhuah chu investment tihna remchang tak a nih thu pawh a tarlang bawk a ni.

Dr. Hari Babu Kambhampati chuan North East State inkalpawhna tichangtlun turin (KMMTTP siam mek a nih thu leh inkalpawhna leh inbiak-pawhna kawnga hmasawnna hian industrialist-te tan sumdawnna kawng awlsam tak a siam thu a sawi a. Tunhnaiah NE India-ah inkalpawhna kawngpui km 3000 chuang siam zawhfel a nih tawh thute, kum 3 chhungin km 10,000 siam leh tum a nih bakah project 400 vel bawr, cheng vbc. nuai khat dawn thawh mek a nih thute a tarlang a. Tunhnai kum 8 chhungin chhungin Air traffic 113% a a pun thu leh Airport thar 8 a awm belh thute, Waterways 17 a awm belh thute bakah Rel kawng km 400 dawn siam a nih thu leh Aizawl khawpui chu nakumah Railway line-a thlunzawm hman tum a nih thu a sawi bawk.