Aizawl-ah kum 7 chhung lirthei intlanchhawk tawh

Aizawl khawpuiah kum sarih chhung lirthei intlanchhawk kalpui ni tawhin tihtawp tumna a la awm lo a. Hetihlai hian tun dinhmuna Mizoram-a lirthei awm zat chu 3,20,404 a tling tawh.

Aizawl-a lirthei intlanchhawk kalpui mek hi October 2, 2017 atanga kalpui tan niin, lirthei number tawp ber zel chu Calendar ni nen a inrual hunah an ding thin a. Tuna hman mek intlanchhawk dan hi June, 2019 atanga hman niin lirthei number tawpa 1 leh 2 te Thawhtanni-ah an ding a, number 3 leh 4-te Thawhlehni-ah dingin 5 leh 6-te Nilaini-ah, 7 leh 8-te Ningani-ah leh 9 leh 0-te Zirtawpni-ah an ding thin a. Inrinni leh Pathianni-ah chuan lirthei zawng zawng tan tlan theih a ni.

Private leh sawrkar motor te bakah, Taxi (Two Wheeler/Four Wheeler) leh City Bus te pawh an intlanchhawk mek bawk a. Taxi (Four Wheeler)-te hi March 1, 2016 atangin sticker A, B leh C-ah thenin an intlanchhawk tan a, Two Wheeler Taxi-te January, 2023 atangin sticker A, B leh C hmangin an intlanchhawk bawk a. City Bus pawh tunah hian hmun ruka thena hmun khat zel chu ni khatah an ding mek bawk a, City Bus-te hi kum 2010 hma lam atanga intlanchhawk tawh niin tun thlengin City Bus bik hi chu anmahni ruahmanna ang zelin an intlanchhawk a ni.

Lirthei intlanchhawk kalpui a nih mek lai hian Mizoram-ah lirthei a pung mek zel bawk a. October 31, 2024 thlenga Mizoram-a lirthei awm zat chu 3,20,404 a tling tawh a, chung zinga 2,19,952-te chu Motor Cycle/Scooter niin, Car 53,260 a awm tawh bawk a ni.