Zirna In-ah ‘Tui in dar’ vuak thin a ni dawn

School Education Department chuan zirna In hrang hranga zirlai naupangin an tui mamawh chanve tal zirna In-ah an in theihna turin ‘Tui in Dar’ (Water Bell) vawi 2 aia tlem lo vaw theuh turin thupek a chhuah.

School Education Department thuchhuah tarlan danin Education Minister Dr Vanlalthlana hova Department hotute thukhawm chuan zirlai naupangte hriselna atan ‘Tui In’ chu chin thanah an neih theihna turin hmalak an rel a, “Hei vang hian School Education Department hnuaia zirna In hrang hrang ten Tui In Dar vua in naupang zawng zawng ten tui an in thin tur a ni,” an ti. Department sawi danin tui mamawh zat chungchangah mithiamte rawn an ni a, Elementary School (Primary leh Middle School) naupangte chuan nitin tui litre 1 leh chanve an mamawh anga ngaih a ni a, High School leh Higher Secondary School naupangte chuan nitin tui litre 2 leh chanve vel an mamawha ngaih a ni bawk. 

School Education Department Director Lalsangliana chuan dar vuak hunbi chu zirna In tinah mahnia ruahmanna siam tur a ni tih a sawi.