Project Pushpak hmalakna Governor an hrilhfiah

Project Pushpak-a Chief Engineer Girish Prasad Singh chuan niminpiah khan Mizoram Governor Dr. Hari Babu Kambhampati chu hmuin Mizoram chhunga Border Road Organisation (BRO) hnuaia hmalakna leh hmachhawpte a hrilhfiah.

Mizoram hmun kilkhawr leh pawimawh tak takte thleng thei tura tun dinhmuna BRO kaltlanga kawngpui leh lei dawh mek thlen chinte inhrilh-hriatna atana ruahman he inkawmna ah hian Governor Dr. Hari Babu Kambhampati chuan ramri depa awm Mizoram chhunga BRO hmalakna zinga hmasawnna ruhrel pawimawh tak, kawngpui sial hna thawhte chu hun pawt rei lo thei ang bera zawhfel a tul thu sawiin, Mizoram hmunhma chu India ram hmun dangte nena a inang loh avangin hmalak dan pawh dinhmunte thlir thiam chunga kalpui thiam a tul thu a sawi a. BRO kawng siam, cheithat leh enkawl zui kawngah theihtawp chhuah turin Project Pushpak chu a chah a ni.

Governor chuan Pushpak-in Mizoram tana project pawimawh tak tak an siam leh an thawk thin chu lawmawm a tih thu pawh sawiin, tawi-awm a inhuam thu a sawi a. Thawhhona tha hnuaiah project-te zawhfel thuai a nih a beisei thu sawiin, hei hian ramri dep State chawikan leh tihhmasawnna kawnga hmalaknaah Mizoram chu rinluh a nih dawn thu a sawi bawk.

Pushpak Chief Engineer chuan BRO hmalakna kaltlanga kawngpui thar bakah kawng awmsa, District leh ramri dep pawhtu kawngpui thawmthat kawnga hmalakna te tarlangin, tunlai thiamna nena tangkawpa kum tluana hman theih tur kawngpui tha zawk siam nana ruahmanna te, inkalpawhna changtlung zawk, ram sum leh pai tihhmasawnna leh eizawnna siam thei tur tinzawna project an ruahman thin thu te a sawi a. Road project-te chu Armed Force veivahna tinzawn ngawr ngawr ni lo, sumdawnna, Tourism leh hmasawnna dang dang atana duan a nih thu a sawi bawk.