Zirlaite tana Chawchhun kalpui zui zel niin sawrkar in theihtawpa hma a lak mek thu a sawi

Pradhan Mantri Poshan Shakti Nirman (PM POSHAN) hnuaia zirlai naupangte hnena chawchhun sem thin chu kumin January thla atang khan sum awmloh avanga harsatna tawkin, sawrkar School te chuan nimin atang khan tihtawp an tum a, sawrkar nen inbiaa kalpui zui zel niin sawrkar chuan nimin khan State tum tur sum chu a pechhuak bawk.

Tunhnaia Mid-Day Meal chungchanga harsatna thleng chungchanga thuchhuah an siamah School Education Department chuan an harsatna ber chawhmeh man (Material Cost) chu kumin January thla atanga tun thlenga pekchhuah a nih lohthu leh Cook-cum-Helper hlawh pawh thla 4 lai chu pek a ni tawh lo tih sawiin, pawi an tih thu an sawi a. “Sawrkar thar hian Cook-cum-Helper te dinhmun hriain, thlakhata Rs. 1500 an hlawh thin chu Rs. 3000-ah tihsan a ni a, heng hlawh thar ang hian April leh May thla hi pek a ni tawh,” an ti a. Hetianga harsatna a thlen chhan ber chu Public Financial Management System (PFMF) hman vang a ni tih sawiin, “Chumi hnuaiah chuan SLS (State Link Scheme) awm lehin Account pathum hawn a ni a, chu chu a hran theuhin Finance Department, PFMS leh State Treasury leh Central lama PFMS te nen inthlunzawm vek a ngai a, hemi buaipui chhung hi hun a heh em vang a ni ber,” tiin “PFMS hi thil thar a la nih avangin State PFMS-a thawktute nen inberawnin inhai kuak chawp zel a lo ngai a, heng zawng zawngte zawh a nih hnuah Central Assistance dilna hi thehluh theih a ni chauh a, kum 2023-24 atana 1st Installment chu October thla laihawl velah hmuh theih chauh a ni,” an ti.

PFMS hi langtlang taka kalpui a nih avangin Fund kal dan hi Central lama miten an rawn hmu vek thei tawh tih pawh sawiin, “Kan fund neih zawng zawng atanga 75% tal kan hman zawh loh chuan Installment dang dil theih a ni lo,” an ti a. Mizoram sawrkarin naupang chawchhun hi a ngai pawimawh em avangin State Share pawh advance-in cheng nuai 484.29 chu Oct. 18, 2024-ah an sanction tawh tih an sawi a. Central lamah pawh lamkal intirin bawhzui nghal turin hma an lak nghal thu an sawi bawk.