Ui thlunna awm lo neitu awm lo a ngaih tur a ni
Hemi chungchangah hian Serchhip District Magistrate Paul L. Khuma chuan tun thla ni 10 khan thupek tichhuakin, India ram chhung leh Mizoram chhungah faina leh hriselna lama hma kan sawn theihna turin sawrkar-in chak takin hmalakna a kalpui mek zel thu leh Serchhip District chhungah pawh mipuiten faina leh hriseina lama hma kan lo sawn zel theih nan theihtawpa hmalakna kalpui a ni bawk tih a tarlang a. Hetihlai hian Ui khuahkhirh lova khawlaia chhuah tir thin hian khawtlang faina, himna leh hriselna a nghawng theih bakah khawtlang hmasawnna leh changkanna daltu a ni theih avangin Section 163 of Bharatiya Nagarik Suraksha Sanhita, 2023 tlawhchhanin thupek a tichhuak a ni.
District Magistrate in thupek a tihchhuah ah chuan mi tumahin midangte tana harsatna siam zawng leh midangte tana hnawksakin Ui an vulh tur a ni lo tih tarlangin, Ui vulhtuten khawlaiah an Ui te an chhuah zalen tur a ni lova, khawlaia an chhuahpui dawnin hrui/chain rinawm tha taka hlingin an kai ngei tur a ni tih te; Ui vulhtuten an an Ui vulh te tha takin an khuahkhirh tur a ni tih te; Ui khawlaia tla leh a nghawnga hrui/chain-a thlunna awm lo te chu neitu awm lo anga ngaih a ni ang tih leh Ui vulhtuten an Ui vulhte zun leh ek khawlaiah an hnutchhiah tur a ni lo tih te a tarlang bawk a ni.
He thupek hi October 10, 2024-a chhuah a nih atangin thu leh a awm hma chuan thla hnih (2) chhung huam tur a ni a, thupek zawm lo chu Section 223 of Bharatiya Nyaya Sanhita, 2023 dan hmangin hrem theih an ni ang.
Comments
Post a Comment