Tuivai Hydel Project siamna tur hmun tlawh

Power & Electricity Minister F. Rodingliana chuan nimin khan Tuivai Hydel Project siam tur hmalak mek chu tlawhin kawlphetha MW 180 tharchhuak thei tura tihpuitlin dan tur a hmunah a en.

Tuivai Hydel Project hi Central Water Commission (CWC) in kawlphetha MW 210 tharchhuak thei turin kum 1992 khan DPR an peihfel a, hmalak zui loha a awm reng hnuah Mizoram Sawrkar-a Ministry thar pian veleh he project hi bawhzui nghal niin, a tir a 210 MW pechhuak thei tura ruahman chu tuikhuah tur hian State thenawm Manipur ramchhung hmun thenkhat a chim ve dawn avangin, Mizoram sawrkar chuan tuikhuah chim chin hi Mizoram chhung pelh tir loh nise a ti a. Tui in a chim chin tur tidanglamin MW180 tal tharchhuak turin ruahmanna a siam ta a ni.

DPR te siam tha a he Hydel Project siam thei tur Private Developer tha thlangchhuak a Tender chhuah leh Mizoram sawrkar in Agreement a sign pui thleng a buaipui tur Transaction Adviser ruatna atan Department of Economic Affairs, Ministry of Finance chuan Mizoram Sawrkar chu cheng vbc. 2.3 rawn pein, heng thil pawimawhte buaipui tur hian Ernst & Young LLP te chu Mizoram Sawrkar in transaction adviser atan a ruat a. Heng zawng zawng ti puitling tur hian Ernst & Young hian hma la mekin, kum khat chhunga Tender chhuahfel hman turin tunah hmalak mek a ni.

He hmalakna kal mek hi P&E Minister F. Rodingliana chuan a hmunah tlawhin Tuivai khuahna tur hmun pawimawh laite a fang a. Ruahmanna ang chuan Powerhouse hi Phuaibuang ramah dah tur a ni a, tuikhuah (dam) hi Ngopa atanga KM 12 a hla, Tuivai-a Livawkkuang hmunah sak turin ruahman a ni. Tun dinhmunah Mizoram in kawlphetha a mamawh san lai ber 163MW vel a mamawh a, he Project hi tihpuitlin anih chuan Mizoram chu power-ah a intodelh thei dawn a ni.