SYS in Coach te ten Training an buatsaih

Sports & Youth Services Department buatsaih ni hnih (2) awh tur Seminar on Sports Medicine and First Aid, Sports Psychology and Method of Training chu nimin khan neih tan a ni.

Sports & Youth Services Department hnuaia Coach te bakah Khelo India State Centre of Excellence (KISCE), District Khelo India Centre (KIC) Coach te leh Scouts & Guides, Adventure Wing Staff mi 50 chuang te telna he Training hi nimin khan Aizawl-a Sports Conference Hall-ah neih tan niin Sports & Youth Services Department changtu Secretary Lalramsanga Sailo chuan a telpui a, Training hmanga intuaithar pawimawh zia sawiin, Sports Department Coach te chu Mizoram thalaite hmasawnna, eizawnna, ruihhlo laka fihlimna leh nungchang siamthatna kawnga an mawhphurhna a sang hle tih a sawi bawk.

He Training ah hian infiammi te performance tih that dan tur te, hriselna, himna, ei in chungchang leh hmasawnna tur hrang hrang te zir ho a ni dawn a. Resource Persons atan Dr. C. Zonunsanga, SRH-ZMC, Falkawn; VL Muanpuii, MHSSP, NHM leh Dr. C. Lalfakzuali, Mizoram University te sawm an ni a, SYS-a Superintendent H Zothansanga chuan a hawnna inkhawm hi a kaihruai a ni.

Sports Department hnuaia Coach te hian Mizo thalai te engemaw zat training an pe tawh a, International leh National Level infiammi langsar tak tak te an lo chherchhuak tawh a. Sports Department hian an Minister hmalakna hnuaiah Vision Olympics 2036 nei mekin Talent Identification, Village Level Coaching leh infiammite dawmkanna tur chi hrang hrang Public Private-Partnership hmangin a ngaihtuah mek a ni. Tunhnai ah khan Incentive Cash Award for Meritorious Sportspersons semna neiin mi 416 in lawmpuina an la a ni.