Serchhip Town chhunga VC hrang hrangte LAD changtu Secretary in Serchhip-ah a kawm
He inkawmhona ah hian LAD Secretary chuan VC te fuihna thu sawiin, hna an thawh nachhan leh sum an hmuhna hnarte an hriatchian loh chuan hnathawh that a harsa dawn a, chuvang chuan engkim an hriat ve vek a tul thu a sawi a. Kum tam tak chhung thingtlang hmasawnna tura tanlak a lo ni tawh thin a. Kum 2021-22 ah Finance Commision in a recommend angin 15th Finance Commission-ah kan lut ta a, hmasawnna hna hrang hrang thawh mek zel a ni tih sawiin, Swachh Bharat Mission (G) te nena thawhhona tha tak an neih thu a sawi bawk. VC te chu Field Level ah tha taka thawhho puiah sawmin, thingtlang khaw tihhmasawn chu an thil tum bulpui a ni tih hriaa khawtlang mipuite hmasawnna atana an sum hmuhte dik leh fel taka hmang thin turin a chah a. Hnathawhna tur sum an hmuh veleh muangchang lova hma la thuai thin turin a chah bawk.
Hun hmanpuitu Serchhip District Bawrhsap Paul L. Khuma pawhin Pu Gandhi-a khan thingtlang khua a ngai pawimawh em em tih sawiin, ‘Thingtlang in hma a sawn loh chuan hmasawnna famkim a awm thei lo a ni’ a tih ang khan kan khawtlang hruaitute pawh Rural Development lama hmasawnna chak lehzual a thlen theih nan theihtawp a tan la turin a fuih a. Faina leh thianghlimna kawngah tun aia chaka tan la thar tura VC te chu chahin, “Kalphung leh tihdan pangngai chuan a kal mai theih a; amaherawhchu, chumi piahlama hmasawn lehzual tur chuan tha leh ngaihtuahna sen belh a ngai nasa hle a ni,” a ti a. VC te mawhphurhna pawimawh zia sawiin, kan khawtlang chawikang tura Pathian in a dah a ni tih te hrechiang turin a chah a. An Scheme khawih laite hrechiang a, Official te finchhuahtu nih tum turin a chah bawk a ni.
He inkawmna hi Serchhip DLAO Dr. C. Vanlalchhanhimi chuan kaihruaiin inlawmna thu a sawi a, Serchhip District-a LAD chanchin leh an hnathawh hrang hrangte a tarlang a, District Park 2- Dawngzawl leh Thenzawl an enkawl mek thu sawiin, Thenzawl hi PMVK hnuaiah thawmthat tuma hmalak mek a nih thu a sawi a. Khaw hrang hrangah Gram Sabha hlawhtling taka neih a nih thu te, Rashtriya Gram Swaraj Abhiyan (RGSA) 2024 hnuaiah Panchayat Bhawan sakna tur Hmawngkawn, Chhingchhip leh Chhiahtlang te thlan a ni a, Common Service Centre (CSC) sakna tur Baktawng-ah pek a nih bakah khaw hrang hrang 11-ah Computer Set pek an nih thu a sawi bawk.
He hunah hian sawrkar leh VC te nena thawhhona chungchang te, khawtlang hmasawnna hna an kenkawhna kawnga an hriat duh te leh harsatna an neih chungchangte sawi hona hun hman zui a ni bawk.
Comments
Post a Comment