Serchhip-ah Shakti Sadan Centre

Harsatna tawk hmeichhiate hun engemaw chen an belh theih tur Shakti Sadan Centre chu Mizoram-ah 12 din a ni tawh a, tun dinhmunah hmeichhia chhawmdawl lai 1193 awm mekin Serchhip-ah pawh Shakti Sadan hi din a ni tawh a ni.

Mission Shakti Scheme hnuaiah Shakti Sadan hi kalpui a ni a, hmeichhe baihvai, harsatna tawk, tlukluhna leh belh tur mumal nei lote, hleilenna tuar, endawng leh tuithlar te pan tura Central sawrkarin a duan a ni a, kum 2022 khan State chhungah kalpui tan niin Women and Child Development Department Asst. Director Lalrammawii Kawilam chuan Centre 12 an kalpui zingah Aizawl-ah 4 a awm a, a dang 8 chu District hrang hrangah dah a nih thu a sawi.

Shakti Sadan Centre hi Serchhip-ah pawh kalpui ni tawhin tunhma lama kalpui thin Swadhar Greh leh Ujjawala Scheme te chu chhunfinin ‘Shakti Sadan’ tih hi a pu zui ta a, Swadhar Greh leh Ujjawala Scheme hnuaia hmalakna zawng zawng kalpui zuiin Serchhip P&E Veng-ah mimal In luahin kumin May thla atang khan bul tanin tunah hian thawktu mi 8 an awm mek a, Resident Superintendent tur lakna pawh kalpui mek niin tunah hian Interview neih a ni tawh bawk a ni. Shakti Sadan Centre -ah hian hmeichhia harsatna hrang hrang tawk te hi kum 3 chhung awm theiin an fanu, pasal la nei lo te pawh an hruai thei a, an fapa te pawh kum 12 hnuailam chu hruai theiin kum 3 aia rei awm mamawh te pawh Magistrate hriatpuina hnuaiah an awm thei a, kum 55 chin chunglam te chu kum 5 thleng awm theiin hemi hnu lamah chuan Old Age Home-ah emaw sawn theih a ni ang.

Hmeichhe harsatna tawk ten Helpline 181 an be thei a, chuta tang chuan Counselling Centre pantir an nih phawt hnuah an mamawh dan a zirin Shakti Sadan hi an pantir thin a. Kum 2022 April thla atanga kumin September thla thleng khan mi 27,187 an be pawp tawh a. Hriat theih chinah phone 181 betu te zingah za a 58 chu hmeichhe chunga hleilenna tuartute an ni a, a dang zaa 42 te chu thildang vang nih thu Asst. Drector chuan a sawi a ni.