Sawrkar hnathawk DA 4% a punna tur pawm

Mizoram sawrkar Council of Minister thukhawm chuan sawrkar hnathawk te Dearness Allowances tihpunna tura rawtna chu an pawm.

Nimin khan Chief Minister Lalduhoma hovin Council of Minister te chu Chief Minister Office-a Cabinet Room-ah thukhawmin hriat theih chinah sawrkar Department atanga thu ngaihtuah tur lut panga (5) te chu pawm a ni a, Finance Department atanga lut ‘Payment of Dearness Allowances to government employees at 4%’ chu pawmin hei hi sawrkar hnathawkte hnena Christmas thilpek atan November, 2024 atanga hman tan tur a ni a. Finance Department atanga lut bawk ‘Payment of Dearness Allowances to Government employees without the approval of the Council of Ministers and revocation of Notification’ chu pawmin hei hi Cabinet thutlukna hmasa anga kalpui tur niin a kaihhnawih Department chu lo siam tha tura tih a ni.

Heng bakah hian GAD atanga lut ‘Proposal for Amendment of The Mizoram Right to Information Rules, 2010’ chu pawmin BPL te tan RTI zawhna zawh man zawng zawng chu a thlawn a ni tawh dawn a. Home Department atanga lut Mizoram State Human Rights Commission dinna tur leh hemi atana Post 16 siamna tur chu pawm a ni bawk a. P&E Department atanga lut ‘Proposal for appointment of Advance Metering Infrastructure Service Provider (AMISP) for implementation of Smart Metering under RDSS’ chu pawm a ni bawk.