Governor in FCS&CA, FCI leh IOC hotute kawmin Sairang thleng tur Rel kawng siam mek a tlawh

Mizoram Larsap Indra Sena Reddy Nallu chuan nimin khan Food Civil Supplies & Consumers Affairs, Food Corporation of India (FCI) leh Indian Oil Corporation (IOC) Official te kawmin Sairang Rel Station sak mek leh Lei (Mualkhang-Sairang, Bridge No.196) dawh mek te a tlawh bawk.

Larsap hian nimin chawhma lam khan Raj Bhavan Mini Conference Hall-ah Supply Department hotute bakah FCI leh IOC hotute kawmin Oil, LPG leh buhfai-a Mizoram dinhmun te, Mualkhang Bottling Plant leh Mizoram-a Godown awm zat leh buhfai chhekkhawl theih zat te,Thla khata LPG kan mamawh zat leh kan dawn dan te a zawt a. FCS&CA, FCI leh IOC Official te chu mipuiin Buhfai, Oil leh LPG-a harsatna an tawh loh nan tang mar pat reng turin a chah a, harsatna an neih chuan a hnena thlen hreh loh tura chahin, sawrkar laipui lama an hotute hnenah pawh an harsatna te thlensaka an harsatna te sukiang tura theitawp chhuaha hmalakpui a inpeih reng thu a hrilh bawk.

FCS&CA Department hotute chuan tun dinhmunah FCI Godown-ah buhfai MT 13,000 a awm mek thu leh FCS& CA Godown-ah MT 8659.33 a awm mek thu an sawi a. October quota sem tawh niin, November qouta pawh karleh lawkah sem leh a nih tur thu Larsap hi an hrilh a ni.

Hemi hnu hian Larsap hian Raj Bhavan kawt-ah Messua Ferrea (Herhse) tiak phunin Sairang Rel Station sak mek leh Mualkhang to Sairang-a Bridge No. 196 dawh mek chu a tlawh zui nghal a, Larsap hi NF Railway-a Deputy Chief Engineer Er. Harjimal Meena leh a thawhpui ten lo dawngsawngin an hna kalpui dan leh an hmabak te lo hrilh a, nakum (2025) July thla ralhmaa Sairang Rel Lei leh Sairang Rel Station chu zawh hman an in beisei thu an lo hrilh a. Sairang Rel Station-ah hian Rel kawng (Track) 13 a awm ang a, Passenger Track 3 leh Non-Passenger Track 10 a awm dawn a ni.

Tarlan tawh angin Mizoram Governor Dr Hari Babu Kambhampati chawlh lak chhunga Governor hna lo chelh lailawk turin Indra Sena Reddy Nallu hi Sept. 30 khan lakluh a ni a. Nimin a heng hmun a tlawh zawh hnu hian Lengpui Airport atangin New Delhi a pan a, tun thla ni 7 khian Mizoram-ah a rawn let leh dawn a ni.