Champhai-ah Hnahsin Kut 2024 hawnna neiin intihhlimna chi hrang hrang neih a ni ang

Champhai Nature Conservancy kaihhruaina hnuaia pawl hrang hrang thawkho ten an huaihawt ‘Hnahsin Kut 2024’ chu nimin October 3, 2024 khan Champhai Phai-ah neih tan a ni.

Hnahsin Kut 2024 hawnna hun hi nimin tlai khan Aui Garden, Champhai Phai phei-ah neih niin Adviser to Chief Minister (Finance) TBC. Lalvenchhunga chuan khuallian niin a hmanpui a, Champhai khawtlang hruaitu hmasa, Phai phei leh hmun pawimawh dang lo humhalh thintu te chungah lawmthu sawiin, Champhai District chuan Swadesh Darshan 2.0 hnuaiah leh sawrkar Scheme hrang hrang atangin hmasawnna tak tak a hmuh a beiseiawm thu a sawi a, mipuite chu sawrkar hmalakna te thlawpa thawhpui thiam turin a ngen a. Champhai khawpui chu khawpui thang lai a nih angin ruahmanna fel tak nen duat taka enkawl a pawimawh thu a sawi bawk. Adviser to CM hian Hnahsin Kut zara mipui ten eizawnna remchang an neih belh chu lawmawm a tih thu sawiin, Champhai chu Mizoram Buhzem, ‘Rice Bowl of Mizoram’ tia chhal thin a nih bakah buhfai kher ni lo Tourism kaltlanga Mizoram buhzem a nih chhoh theih a beisei thu a sawi bawk.

He hunah hian Khual zahawm, Champhai North bialtu MLA leh Adviser to CM (Technical) Er H. Ginzalala pawhin Hnahsin Kut chu khualzin hip kawnga bung thar kai theihna pawimawh tak a nih thu leh Mizoram sawrkar pawhin theihtawp chhuahpui zel a inhuam thu a sawi a. Champhai District chu Mizoram Tourism hmunpui ni tura theihna nei a nih thu leh Swadesh Darshan 2.0 leh hmun hrang hrang atangin Tourism tihhmasawnna tur hmuh theih a beiseiawm tih a sawi a. Khual zahawm Champhai South Bialtu MLA Lt. Col. Clement Lalhmingthanga pawhin Hnahsin Kut chu zau zawka mi ten an hriat a, Kut hlu leh pawimawh tak a nih chhoh zel a beisei thu a sawi bawk.

Hnahsin Kut 2024 hi Champhai Nature Conservancy kaihhruaina hnuaia pawl hrang hrang thawkho ten an huaihawt a ni a. Kut-ah hian Adventure Sports, Concert, Fashion Show leh Stall hrang hrang chhim tur a awm dawn a. MzSRLM hnuaia Self Help Group ten an thilsiam an phochhuahna SARAS Fair chu Hnahsin Kut rual hian neih a ni dawn bawk a. Oct. 4, 5 leh 18-ah te hun hman tura ruahman a ni.