Khawvel pumah Upate Ni hmang

Nimin October 1, 2024 kha khawvel puma kum upate ni, International Day of Older Persons a ni a, hmun hrang hrangah he ni hi urhsun taka hman a ni.

International Day of Older Persons hi Serchhip-a Mizoram Upa Pawl (MUP) Unit te chuan an remchan dan anga hmangin vantlang tana thil tha tihna ni atan te an hmang a, MUP Ser-chhip Chhim Veng Branch te chuan an huamchhung khawlai thenfai hna thawkin chawhnu lamah he ni pual hian inkhawm an nei a, MUP Chanmari Unit te pawhin zingkar-ah hnatlang neiin hun an hmang bawk a ni.

MUP Serchhip Dinthar Branch te chuan C, Khuangawia In-ah he ni pual hun hun hmangin Member boral sunna hun an hman bakah intih-hlimna hun an hmang a, MUP Serchhip Vengchung Branch te chuan Zoluti Hall-a he ni pual hian hun an hmang a, Member boral sunna hun hmangin Programme hrang hrang an buatsaih bawk a. Heng bakah hian Unit dangte pawhin an remchan angin hun an hmang bawk a ni.

National Health Mission (NHM) hnuaia National Programme for Health Care of the Elderly (NPHCE) bultumin nimin-a International Day of Older Persons pual hian Aizawl-a Central YMA Conference Hall-ah hun hman a ni bawk a, NPHCE-a State Nodal Officer, Dr. Catherine Lalmuanawmi chuan India ramah hian kum upate kan pung chho tial tial tih sawiin, “Zirchianna in a tarlan danin kum 2013 khan India ramah kum upa maktaduai 100 vel awmin kum 2021 khan maktaduai138 vel an awm tawh a. Kum 2050-ah chuan maktaduai 347 chuang tura ngaih a ni,” a ti a.  “Mizoram-ah hian mi nawlpui damrei zawng (life expectancy) pawh tunah chuan a lo kang chho ve hret hret zel a. Tunah hian Mizo mipa dam rei zawng hi kum 68.3 niin hmeichhia hi kum 73 bawr ni a chhut a ni. Mizoramah hian mipui za zela 8 hi kum upa, kum 60 chin chung lam an ni,” tiin hei hi thil ropui tak a nih thu leh kum upate hlutna kan hriatchian lehzual a hun thu a sawi bawk.