Inchai Title Fight nei dawn

Kumin December 9-11 chhung khian LPS Arena, Falkland-ah Inchaipui neih a ni dawn a, inbuatsaihna kalpui mek a ni.

Zan thum awh tur Inchaipui-ah hian Mizo Palian Inchai Champion lai Lalsangliana chuan Lalrinchhana Sailo lakah a Title humhim a tum dawn a, kum 29 mi Lalrinchhana Sailo hian kumin August thla khan Champion lai Lalsangliana cho thei tur zawnnaah Lalremtluanga (Zobawk) leh Laldinthara (Zo-khawthar) a hneh ve ve a, a vawi khat nan Mizo Palian Inchai Title chuh turin a tlang ni.

Lalrinchhana Sailo chuan a hliam vangin Title Fight hun sawn hlat dil mah se an pawmsak a ni lo thung a, “Rinchhana dilna hi zahawm hle mah se a hun sawn hlat a nih chuan Title Fight dang zawng a nghawng vek dawn a. Sipai, December kar hnihnaa inchai tura chawlh la tawhte, he hun atana kawng hrang hranga inbuatsaih tawh te vek an ni hlawm a ni,”an ti.

Kumin-a Title Fight-ah hian Palaihawl Champion Remruatpuia leh amah chotu Ngur-sangzuala, Pate Champion B. Lalawmpuia leh amah chotu Lalchhanhima an innuai dawn a. Nulian Champion Lalhmangaihsangi leh amah chotu Zodinpuii, Nulaihawl Champion Elizabeth Rohlupuii leh amah chotu Penticost Lawmsangpuii Varte, Nute Champion Lalvenhim leh amah chotu Lalnuntluangi te bakah, Freestyle Wrestling tihhmasawn nan Exhibition Match engemaw zat a awm tel dawn bawk a ni.