Halpuah khap ah YMA in sawrkar a thlawp

Halpuah leh halmawi khap chungchang ah YMA chuan Sawrkar hmalakna a thlawp thu leh mahni Branch huamchhung theuh ah he hmalakna hi Branch YMA tin ten chak taka hmalak chu an tihtur a nih thu Central YMA hruaitute chuan an sawi.

Nizan hmasa khan Dawrpui Multipurpose Centre-ah Krismas leh Kumthar vuakveta Halpuah leh Halmawi chungchangah Aizawl khawpui chhunga Branch YMA hruaitute inrawnkhawmna chu neih a ni a, he hun hi Central YMA President Lalhmachhuana chuan kaihruaiin Central YMA Vice President Prof. Lalnuntluanga chuan Krismas leh Kumthar vuakveta Halpuah leh Halmawi hal that loh zia leh a nghawng te, YMA Branch te thahnemngai taka tan tlan a tul zia te a sawi a. Halpuah leh halmawi khap chungchang ah YMA chuan Sawrkar hmalakna a thlawp thu leh mahni Branch huamchhung theuh ah he hmalakna hi Branch YMA tinten chak taka hmalak leh chu an tihtur anih thu te a sawi a. Naupang kum tling lo zan len khuahkhirh a tul zia leh hei hian khawtlangah sualna a tih punlun dan te, tleirawl insual rawn a hluar dan te sawi bawkin, Insualrawn thleng fo chu ruihtheih thil tih avanga lo thleng anih thu a sawi bawk

He hun hmanpuitu Home Minister K. Sapdanga chuan dan leh thupek hmanga halpuah leh halmawi khap tur hian Sawrkar chuan khauh taka hma a lak tur thu leh Sawrkar hnathawk inhnamhnawih chu hrem an nih tur thu sawiin, Sawrkar hmalak tum dan te a sawi a. YMA te nena thahnemngai taka an tanrual chuan a hlawhtlin ngei a beisei thu a sawi a. Halpuah leh halmawi hi Kumthar lawmna chhe ber a nih thu pawh sawiin, Krismas vuakveta YMA Branch Duty te thingpui inna tur Sawrkar atangin ruahman a nih tur thu a sawi bawk.