Vawk 9718 chan a ni tawh

Kumin chhungin Serchhip District-ah African Swine Fever (ASF) vanga Vawk thi leh suat 9718 a awm tawh.
AH&Vety Department ten an chhinchhiah danin Inrinni khan Serchhip District-a khaw pali-ah ASF vanga Vawk thi 9 awmin khaw 7-ah Vawk 33 suat leh a ni a, nimin khan khaw pathum-ah Vawk thi 3 a awm leh bakah Vawk 10 suat leh a ni bawk. Heti hian nimin thleng khan Serchhip District chhungah kumin chhung hian ASF vanga Vawk thi 3225 awmin Vawk 6493 suat a ni tawh bawk a ni.

Hetihlai hian Mizoram puamah Inrinni thleng khan kumin-a ASF vanga Vawk thi chu 12,510 a tling tawh a. Vawk pul hri hi a la reh mai thei lovin khaw hrang hrang 234 teh meuh a nghawng tawh a. ASF vanga Vawk suat hi kumin chhungin 21,561 an tling tawh a, tun hnaiah chuan hrileng hian ziaawm lam a pan ve hret hret nia hriat a ni. Sawrkar chuan ASF hi a buaipui zel a, tunhnai khan AH & Vety Minister C. Lalsawivunga chuan sawrkar laipui hnenah ASF damdawi rang taka siam emaw, ram dang atanga a lakluh dan kawng emaw dap turin a lo ngen tawh bawk a ni.