UD&PA Minister in PRAISE Award a sem

Performance Recognition for Access to Financial Inclusion and Street Vendors Empowerment (PRAISE) Award semna hun chu nimin khan Aizawl Vanapa Hall-a neih a ni a, UD&PA Department changtu Minister K. Sapdanga chuan a hmanpui a ni.

PRAISE Award semna hunah hian UD&PA Minister chuan a Department enkawlin mi harsa zawkte, mi chhumchhiate chawikan leh dawmkan nana an hmalakna leh Bank (Lending Institution) te hmalakna te chu fakin lawmawm a tih thu a sawi a, theihtawp chhuah zel turin a fuih bawk. Loan kan lak hian kan pawisa emaw tih mai a awl thu leh chetsual a awl thu Minister chuan sawiin, Loan hi hmang tangkai te tan chuan malsawmna hlawmhlak a ni a, hmang tangkai lo te tan erawh chhiatna a ni tih hrereng turin kalkawmte chu a chah a. Loan chu Bank te'n min hawhtir mai a nih avangin kan eizawnna bul tan nan chauh hmang turin a chah bawk.

UD&PA Minister hian Best Performing ULB chu Aizawl Municipal Corporation hnenah hlanin Best Performing Lending Institutions chu Mizoram Rural Bank leh State Bank of India hnenah a hlan a, Best Performing Bank Branches Award chu Mizoram Rural Branch atangin Champhai Branch, Durtlang, Khatla, Saitual leh Vaivakawn Branch, State Bank of India atangin Aizawl Branch, Dawrpui Branch leh In Touch te hnenah PRAISE Award hi a hlan nghal bawk a ni.

He hunah hian Dr. Andrew H. Vanlaldika, Mission Director, DAY-NULM, UD&PA Department chuan PM-SVANidhi Scheme chungchang sawifiahna neiin PM- SVANidhi-in a tum ber chu COVID-19 Pandemic laia eizawnna khaihlak, Street Vendors (kawngsira dawrkai te) eizawnna siamsak niin pawisa pung tlem zawka Lending Institution atanga dawn theihna a ni a. Loan an lakah hian central sawrkar chuan 7% a pung a rulhsak a ni. Kumin leh nikum India Republic Day hmanna-ah khan PM- SVANidhi beneficiary te chu India khawpui New Delhi-ah hruai an nih thu a sawi bawk.

PM-SVANidhi Scheme hi Mizoram-ah July 1, 2020 khan kalpui tan niin he Scheme hian hamthatna hrang hrang pariat (8) a keng tel a. Beneficiary te chu Digital Payment System zirtir an nih bakah Digital Payment System hi an dawrah ruahmansak an ni a. He Scheme hnuaiah hian 1st Loan Rs. 10,000/- niin kum khat chhunga rulh zawh tur a ni a. 2nd Loan Rs. 20,000/- niin kum khat leh a chanve chhunga rulh zawk tur leh 3rd Loan Rs. 50,000/- chu kum 3 chhunga rulh zawh tur te a awm a. A pung tlem leh dahkham neih ngai lovin an la thei a ni. PM-SVANidhi Scheme hnuaiah Mizoram-ah 1st Loan 4025-ah 2364 (59%), 2nd Loan 340-ah 381 (112%) leh 3rd Loan 100-ah 102 (102%) pekchhuah tawh a ni.