State Election Commissioner thar in a hna a zawm

Mizoram State Election Commissioner (SEC) atana ruat Dr. H. Lalthlangliana chuan nimin khan State Election Commissioner hna zawmin a Pisa a luah tan a, thawktute nen an inkawm nghal a ni.

SEC thar Dr. H. Lalthlangliana hi MCS zinga Senior ber, Land Revenue & Settlement Department Secretary ni lai a ni a, Secretary a nih hma hian Mizoram Sawrkar hnuaiah hna hrang hrang lo chelh tawhin nakum December ni 31-a pension tur a ni a, State Election Comissioner atana ruat a nih tak avang hian niminpiah September ni 9, 2024 khan Sawrkar atangin Voluntary pension in a chhuak ta a ni. SEC-ah hian kum 5 emaw, amah kum 65 anih thleng emaw a thleng hma zawk zawk thleng thawk tura ruat a ni a, SEC thar hian a term hmang tluan pawh nise kum 65 a tling hman dawn lo tihna a ni.

State Election Commissioner-ah hian Sawrkar Department-a Secretary puitling ni tawh, Election lama tawnhriat nei tha kum 65 la tling lo te ruat theih a ni a; SEC-ah hian C Ropianga IAS (Rtd), L.Tochhawng IAS (Rtd), Lalnunmawia Chuango, IAS (Rtd) (CS ni chunga charge la) leh Laima Chozah IAS (Rtd) ten he hna hi an lo thawk tawh a, Dr. H Lalthlangliana MCS (Rtd) hi Mizoram State Election Commissioner 5-na a ni.