Tunhnaia thil thleng ah inremna neih tawh thu sawi

Tunhnaia Zokhawthar rawlthar pahnihte CDF-Hualngoram sipaiten an hren chungchang ah khawtlang hruaitute chuan inremna an nei tawh tih thuchhuah siamin an tarlang.

Zokhawthar a VC leh tlawmngai pawl hrang hrangte leh Tiau-Khawmawi VC te, CDF Hualngoram aiawhte chuan Nilaini khan inbiakna neiin hemi hnua thu-chhuah intawm an siamah kha thil thlengah khan inremna an nei tih an sawi a. An thuchhuahah chuan thla hmasa ni 31-a CDF-Hualngoram sipai pakhatin kut a tawrh chungchangah Zokhawthar rawlthar pahnih chu CDF-Hualngoram sipaiten thu zawhfiah duhin an kawl a. Kha thil thlengah khan boruak duhawm lo thleng lovin harsatna chinfel a ni, an ti a.

Zokhawthar leh Khawmawi te chu khaw pakhat anga inchen pawlh leh inkalpawh thin an nih avangin khawi lam ve ve-ah pawh thalaite thu lo inbah sual changte a awm thin a. Tunhnu ah hetiang thil hi a thleng leh palh a nih pawhin a rang thei ang bera leh lam ve ve a hruaitute inhriattira chinfel thin nise an ti a. Tun boruak hi a zual zawnga tharthawh sak lo turin mipuite an ngen bawk. Hei bakah hian ramri depa cheng an nih angin ei leh bar zawnna kawng leh vantlang mipui nihphungah in mamawh tawn an nih angin, inhmu thiam lo leh intihrang thei an ni lo tih an pawm thu te, thlahtu thuhmun an nih anga an inlaichinna vawn nun zel an duh thu te an tarlang a. Tiau-Khawmawi aiawhte hian Zokhawthar khawtlangin raltlan an lo dawnsawn kawngah lawmthu sawiin, an tlin lohna leh tihsual zawng zawngah thupha an chawi tih an tarlang tel bawk a ni.

Kumin July 25 atanga Myanmar atanga Zokhawthar-a bungraw lakluh khapna chu chhun-zawm zel ala ni a, ramri-a insumdawn tawnna khar a nih bakah lirthei hmang pawhin inkalpawh phal a ni lo a, mihring ke-a intlawhpawh erawh phal a ni thung a ni.