Kumin ah ruahtui a tam; August-ah a tla tam zual

Kumin January leh August inkarah Mizoram-ah ruahtui tla a tam hle a, hemi hun chhunga Aizawl-a ruahtui tla chu mm (millimetre) 1,941.7 a tling tawh a. Kumina ruahtui la tlak tam ber thla chu August a ni.

Directorate of Science & Technology chhinchhiah danin kumin January atanga August chhunga ruahtui tla zat hi kum hmasa lam January-August chhunga ruahtui tla zat aiin a tam hle a, nikum January - August-a ruahtui tla zat chu mm 1,378.7 a ni. Nikum khan January leh February-ah ruahtui tla a awm lo a, March-ah 78.0, April-ah 98.1, May-ah 102.8, June-ah 381.7, July-ah 291.0, August-ah 427.1, September-ah 321.7, October-ah 80.0, November-ah 108.8 leh December-ah mm 83.6 a tla, nikum chhunga ruahtui tla zawng zawng mm 1,972.8 a tling a. Kumin hian January-ah ruahtui mm 1.8 a tla a, February-ah mm 15.2, March-ah mm 33.8, April-ah mm 87.0, May-ah mm 519 leh June-ah mm 353.7, July-ah mm 35.5, August-ah mm 572.7 a tla a. Kumina ruahtui tlak tam ber ni chu May 28 niin mm 205.0 a tla a, data atanga a lan danin, hetiang zata tam ni khat thil thu-ah ruah a tla zen zen lo a ni.

State Meteorological Centre, Directorate of Science & Technology-in a chhinchhiah tawh chinah Mizoram-ah kum 36 chhung (1986 atanga 2021) khan Fur lai (June - September) ah kumtin ruah mm 1,289.9 sur ang a ni a. Kum 2017 kha Fur chhung bika ruahtui tlak tam ber kum niin, June - September thla chhungin mm 1,836.0 a tla a. Kum 2020 kha Fur chhung bika ruahtui tlak tlem ber kum a ni a, June - September thla chhungin mm 856.4 chauh ruah a tla a ni.