GST Council Meeting-ah Taxation Minister tel

Niminpiah khan New Delhi-a Sushma Swaraj Bhawan-ah GST Council Meeting vawi 54-na neih a ni a, Mizoram atang pawhin Taxation Minister Dr. Vanlalthlana a tel a ni.

GST Council Meeting hi Council Chairperson leh Union Finance Minister Nirmala Sitharama-i chuan kaihruaiin GST hi dan pakhat, Goods and Services Tax Act, 2017 hmanga India ram puma bungrua lei leh hralh leh service-a chhiah lakna a ni a. A enkawlna atan pawh hian India ram-a State zawng zawng leh Central (CBIC) Department ten System Software pakhat, Goods and Services Tax Network (GSTN) an hmang a ni. He System changtlung tak hian GST hi India ram pumpuiah enkawl a. Chuvangin, he Council Meeting hi Central sawrkar leh GST Council hian an ngai pawimawh em em a. Member (Minister) leh Official te hi Meeting a tel ngei ngei tura beisei an ni.

Tun tum Council Meeting-ah hian agenda tam tak zinga an sawi pawimawh zual zingah Mizoram pawh direct taka min khawih tel thei pawh a awm nual a; heng zingah hian Cancer damdawi atanga Tax rate, zaa 12% atanga zaa 5% a tihhniam pawh a tel a, hei hian damdawi man a tihhniam phah dawn a, a bikin Cancer vei tamna Mizoram mipui tan a zangkhai phah tura ngaih a ni. Taxation Minister hian sawrkar laipui-a mi pawimawh te a hmu chhunzawm dawn a ni.