Serchhip District-a Zirtirtu hnathawk tha 4 te ‘Serchhip District Special Teacher’s Award’ hlan an ni

Serchhip District chhunga Zirtirtu hnathawk tha thlanchhuah mi pali (4) te hnenah nimin khan ‘Serchhip District Special Teacher's Award’ hlan an ni a, heng te hi Primary School, Middle School, High School leh Higher Secondary School atangin mi pakhat theuh te an ni.
Kumin a Zirtirtute Ni, Teachers’ Day hman dan tur ngaihtuaha District Level Committee for Celebration of Teachers’ Day 2024 thukhawm in a lo rel tawh angin heng Zirtirtu tha thlanchhuah mi pali (4) te hnenah hian ‘Serchhip District Special Teacher's Award’ hlan an ni a, kumin-a Award dawngtute hi Primary School-ah K Lalthazuali, Headmaster, Govt. Chhingchhip P/S-I; Middle School-ah C. Zohmingliana, Headmaster, Govt. Gospel Centenary M/S, Chhipphir; High School-ah Remkunga, Headmaster, Hrangturzo H/S, North Vanlaiphai leh Higher Secondary School-ah RK. Sanghmingliana, Lecturer, Govt. Higher Secondary School, Serchhip te an ni a. Heng mite hnenah hian Chawimawina thuziak lh Rs. 2000/- hlan an ni.

Heng Zirtirtu tha thlanchhuah te chawimawina hlanna hun hi nimin khan neih niin Serchhip District Education Officer (DEO) Lawmawma chuan RK. Sanghmingliana, Lecturer, Govt. Higher Secondary School, Serchhip leh Remkunga, Headmaster, Hrangturzo High School, N Vanlaiphai te hnenah a hlan a, Thenzawl SDEO Melody L. Betlu chuan C. Zohmingliana, Headmaster, Govt. Gospel Centenary M/S, Chhipphir hnenah hlanin John Lalbiakliana Pachuau, SDEO Serchhip chuan K. Lalthazuali, Headmaster, Govt. Chhingchhip P/S-I hi a hlan ve thung a, heng Award hlanna pual hian a hrana Programme siam erawh a awm lo a ni.

Tarlan tawh angin Serchhip District Level Committee for Celebration of Teachers’ Day 2024 chuan kumin-a Teachers’ Day pualin Serchhip District chhunga zirtirtu hna thawk thate chu chawimawi ngei nise, tiin a lo rel tawh a. Hemi bawhzui hian chawimawina hlan turte thlang chhuaktu tur Committee a din a, chu Committee chuan heng Award dawng tur zirtirtu hna thawk thate hi a thlang chhuak a. Teachers’ Day pualin Award te hi sem a ni ta a ni.

Teachers’ Day hi Serchhip District-a zirna In hrang hrangte chuan anmahni remchan angin an hmang hlawm a, zirlai ten an Zirtirtute chawimawina hun hmangin thilpek te an hlan a. School Education Minister thuchah chu School tinah chhiarchhuah vek niin Serchhip DC Paul L. Khuma chuan Local Cable TV kaltlangin Teachers’ Day puala thuchah a sawi bawk a ni.