ASF ziaawm ve leh hret

Serchhip District-ah African Swine Fever (ASF) hri leng mek chu a ziaawm ve hret hret niin a lang a, nimin khan Vawk thi 14 awmin Vawk 35 suat a ni bawk.
AH&Vety Department in an chhinchhiah danin nimin khan Serchhip District-a Veng leh khua 7-ah ASF vanga Vawk thi 14 a awm a, heng te hi Thenzawl-ah 5, Chhiahtlang-ah 3, Baktawng-ah 2 leh North Vanlaiphai leh Khaw-lailung-ah pakhat ve ve an ni. Nimin vek khan Veng leh khua 7-ah bawk Vawk 35 suat a ni leh a, heng zinga 13 chu Chhiahtlang-ah niin Khaw-lailung leh New Serchhip North-ah 7 ve ve, East Lungdar-ah 4, Serchhip P&E Veng-ah 2 leh Thenzawl leh New Serchhip South-ah pakhat ve ve an ni.

Kumin chhung hian Serchhip District-ah ASF vanga Vawk thi hi nimin thleng khan 3097 a awm tawh a, Vawk 6264 suat ni tawh bawkin khaw 30-a chhungkaw 1928 ten hri hi an tuar tawh bawk a ni.