Leimin danna siam dan tur DC hovin sawiho

Serchhip District chhung Baktawng Chan In vela Lei tawlhna hmuna Retaining Wall siam tur chungchangah Serchhip District Bawrhsap Paul L. Khuma chuan nimin khan Contractor te leh leimin avanga harsatna tawk chhungkua te a kawm.
Tunhnaia ruahsur nasa ah National Highway-54 in a paltlang Baktawng Chan In vela hmun thenkhatah lei tawlh a tam hle a. Heng leitawlh avang hian chhungkua engemaw zatin harsatna an tawk a, kawngpui thenfai hna thawh leh vil zui reng a ngai bawk a. Chhiatna nasa zawk a thlen loh nan lei tawlh leh leimin zel tur ven nan mimal ram hmun thenkhat la heka Retaining Wall siam a ngai a, hei vang hian Bawrhsap chuan hemi chungchanga hmalak dan tur ngaihtuah hian thutkhawm hi a ko a ni.

Nimin-a thutkhawm ah hian leitawlh in a nghawng nasat zual chhungkaw 6 te telin, Lei tawlh nasa avangin an chenna In leh a chhehvel a khi nasa hle tawh a. Hei vang hian a rang lama Retaining Wall siam a tul hle tih tarlan a ni a. Amaherawhchu, mimal ram thui tak lak hek tel a ngaih dawn avangin a kaihhnawih chhungkua zawng zawngte leh Contractor te inlungrual tlanna tur inremna thuthlung ziah nise an ti a. Contractor te chu a rang lama a hmunhma zirchiang nghal tur te, Retaining Wall an siam dan tur ruahmanna kimchang siama September ni 15 ralhmaa DC hnena report thehlut hman ngei tura hriattir an ni a. Report a luh veleh DC kaihhruaina hnuaiah inhmuhkhawmna neih leh tur niin inremna ziah a ni anga. Hemi zawh veleh hian Retaining Wall siam hna hi Contractor ten an thawk tan nghal dawn a ni.