Serchhip District-a HIV/AIDS & STIs dona kawnga hmalak dan tur ngaihtuah a ni

Nimin khan Serchhip-ah District Aids Prevention & Control Committee (DAPCC) chu thukhawmin Intensified IEC Campaign 'India Fight Against HIV & STI' hnuaia hmalak dan tur hrang hrang sawiho a ni.

Serchhip DC Meeting Hall-a he thutkhawm neih hi an Chairman leh District Bawrhsap Paul L. Khuma chuan kaihruaiin Mizoram chuan a chhe lamah India rama No. 1 nihna kan neih thu sawiin, HIV/AIDS chungchang ah pawh a vai tamna kan nih thu a sawi a. Hei vang hian chhungkua atanga hma kan lak a ngaih thu leh inzirtirna kalpui a tul thu a sawi bawk a ni.

He thutkhawm ah hian District Aids Prevention & Control Committee (DAPCC)-a Member Secretary Dr. Lalnunhlima Khiangte chuan HIV/AIDS chungchanga India ram dinhmun leh Serchhip District dinhmun tlangpui tarlangin, Mizoram-ah kum 1990 atanga nikum September thla thleng khan HIV hri kai 29,514 hmuhchhuah an nih tawh thu leh heng zinga 27,080 te chu mipui nawlpui enfiah atanga hmuh niin a dang 2434 te chu raipuar enfiah atanga hri kai hmuh te an nih thu a sawi a. Serchhip District-ah pawh kum 2023-2024 chhung khan mipui nawlpui te thisen enfiah 2214 atangin HIV hri kai 77 leh raipuar enfiah 720 atangin HIV hri kai mi 4 hmuh an ni tih a sawi bawk a. Nikum September thla atanga Serchhip District chhung khaw hrang hranga Integrated Halth Campaign neih chhunga an hmalakna te a tarlang bawk.

Nimin-a thutkhawm ah hian Intensified IEC Campaign 'India Fight Against HIV & STI' hnuaia hmalak dan tur hrang hrang sawiho niin Zirlaite tan HIV/AIDS & STIs’ chungchangah inzirtirna kawng hrang hranga kalpui a ni dawn a. He hmalakna hnuaiah hian tun thla ni 12 khian Serchhip-a Middle School, High School leh Higher Secondary School-a Zirlai naupangte tan Rally neih tura ruahman niin hemi rual hian Serchhip Auditorium-ah Placard Designing Competition pawh neih nghal a ni dawn a. Hemi hmun ah hian zirlai pawl hrang hrang pali - NSS, Red Ribbon Club, Drug Awareness Club leh DIET-a Training ten HIV/AIDS chungchang inzirtirna atan Stall an hawng bawk ang. He hmalakna hnuaiah hian High School chin chunglam te tan Musical Drama intihsiakna neiin High School leh Higher Secondary School Zirlaite tan Debate buatsaih a ni bawk anga, Photo Booth pawh zirna In ten an buatsaih bawk ang.

He thutkhawm ah hian kumin a Red Ribbon Quiz Competition neih dan tur pawh sawiho niin pawl 8, 9 leh 11 zirlaite ten kumin hian District Level-a neih leh hmasak tur a ni dawn a, September 20-ah neih tura relin, heta titha te hian State Level inelna ah Serchhip District ai an awh leh dawn a ni.