Serchhip-ah ‘International Trade Expo’ buatsaih a ni

State pawn atanga sumdawng hrang hrang ten an thil zawrh te mipuite hnena an hralhchhuahna hun, ‘International Trade Expo’ chu nimin khan Serchhip Auditorium Ground Floor-ah neih tan a ni.
He Trade Expo hi Serchhip District Bawrhsap Paul L. Khuma chuan hawngin Zorun Events te thahnem ngaihna avanga India ram hmun hrang hrang atanga mipui mamawh lei tur tam tak Ser-chhip-ah chhawpchhuah a ni chu lawmawm a tih thu sawiin, a buatsaihtute remhriatna leh taimakna chhuanawm a tih thu a sawi a. International Trade Expo buatsaihtuten Market zirchianna an neih ah Serchhip mipuite chu mi fel leh inhawng tak, thawhpui nuam leh Event lian tham buatsaih pawha hlawhtlinpui tham nia an hmuh avanga hetiang hun Serchhip-a rawn buatsaih a ni chu lawmawm a tih thu a sawi bawk.

Serchhip Bawrhsap chuan hetiang hun Serchhip-a buatsaih a ni chu mipuiten an mamawh leina hun remchanga an hman bakah sumdawnna bul tan turte leh sumdawng mekte tan tangkai taka hman theih nise a duh thu a sawi a. Mizoram chhung mai ni lo phailam thleng pawha sumdawnna zauh duh tan leh phai lam atanga bungrua chahlut duh tan te pawh hmelhriat neih zauna leh thawhpui theihna remchang a ni tih sawiin, phai lama sumdawng te chu kum tak tak tawnhriat nei tawh, Custormer te duat kawngah pawh entawn tlak an nih avangin sumdawnna kawngah an hnen atanga zirchhuah tur a awm ngei a beisei thu a sawi bawk.

He International Trade Expo hi tun thla ni 24 thleng neih phawt tura ruahman niin a tul anga pawhsei theih tura ruahman a ni a, dawr 40 vel hawngin Mizorama lei mai tur awm lo lehkhabu chi hrang hrang te, thawmhnaw te, inchhung bungrua te, choka hmanrua te, khawl thil te, ei tur chi hrang hrang te zawrhchhuah a ni a, zan lamah dar 9:00 thleng hawn tur niin dawr hawngtute pui tur hian tualchhunga thalai rual te rawih an ni bawk. Kumin hian Lunglei leh Champhai-ah buatsaih a ni tawh a ni.